Үнүрүүн, арба, төлөпүөнүм алдьанан хаалла ээ. Сиэним уол ииттэрэр тэрилим быатын алҕас быһан кэбиһэн, мөҕүлүннэ. Онтон атын ииттэрэр тэрил булан биэрбиттэригэр, хайаҕаһыгар сатаан батарбакка, букатын да алдьатан кэбистим. Атын аата атын буоллаҕа. Онон букатын кэпсэтэр да, били, “бассааптаһар” да кыаҕа суох оҕонньор буола түстүм. “Бассааппытын” үөҕэбит да, мэлийдэхпитинэ, атын сирэй буолар эбиппит… Хайдах эрэ тугуҥ эрэ тиийбэт курдук, сонуну-нуобаһы билбэт, сэлэспэт эмиэ да эрэйдээх эбит. edersaas.ru
Онон, дьэ, төлөпүөммүн оҥорторо барар буоллум. Чугастыы, ааһан иһэн, куорат килбэйэр киинигэр “Глобус” атыы-эргиэн дьиэтигэр баар суотабайы оҥорор сири буллум. “Сөп, балтараа тыһыынчаҕа оҥоруохпут, аны үс чааһынан, сэттэ иннигэр кэлээр” диэтилэр. Мин эгди буола түстүм, оҥорторбут саҕа сананным.
Сатахха, даачаҕа олорор буолан, онно төнүннэхпинэ, төһөнөн эргийэн кэлэрим биллибэт. Аны сарсыныгар кэлиэхпин, дойдубуттан балтым эрийиэхтээх этэ. Хайыахпыный, кэтэстим. Үс чааһы быһа болуоссаттарга да олоро сатаатым, маҕаһыыннары да кэрийдим. Кырдьаҕас киһиэхэ ордук-хос хамсаныы, сыала суох таах тэйбэҥнии сылдьыы ыараханын бэйэҕит да өйдүүргүт буолуо.
Ол да буоллар, болдьохтоох чааһым үүнэн, били сирбэр тиийдим. Пахай, уолум олох да туппакка да олорор эбит. Аны “сэттэ аҥар чааска кэлээр” диэтэ. Хайыамый, төлөпүөннэнэр туһугар, тулуйарбар тиийдим. Хата, ханнык эрэ аһыыр сиргэ киирэн, сылайбыт атахпын сынньатан, олоро түстүм.
Сэттэ аҥарга тиийбитим, төлөпүөнүм сытарын курдук сытар.
—Доҕор, эн оҥорбот эрээри, киһини тоҕо сааратаҕын? Оҥорор болдьоххун чопчу этиэххин? Кырдьаҕас киһини хос-хос сырытыннаран, таах эрэйдээтиҥ…
— Оччоҕо төттөрү ыл ээ, — диэн баран, күн кыһалҕата суох, быраҕан биэрдэ.
Бөтө бэрдэрэммин, саҥарбакка да эрэ, тахсан бардым. Ити үлэҕэ эппиэтинэһэ суох буолууттан, киһиэхэ кыра да убаастабыла суох сыһыантан олус хомойдум. Даачабар тиийэр бүтэһик оптуобуспун куоттара сыһан, илдьи сылайан, дабылыанньам тахсан, дьиэбин ыкса хойут, хараҥарыыта буллум. Эмээхсиним барахсан долгуйан, бэлииссийэҕэ тыллаары бэлэм олорбут…
Сарсыныгар эмиэ ыйдаран, аны урукку “Туймаада” маҕаһыынын утары турар дьиэҕэ баар “Суотабай өрөмүөнэ” диэҥҥэ тиийдим. Оҥорор уол көрөн баран, “800 солкуобайга оҥоруом, биир чааһынан кэлээр” диэтэ.
Чаас курдугунан тиийбитим, номнуо оҥорон, ииттэрэ сытыарар эбит. Үөрэн, күлүкпэр имнэнним. Хата, бэҕэһээ оҥорторботоҕум үчүгэйин! Сэттэ мөһөөҕүнэн барыһыран таҕыстым. Куһаҕан да үчүгэйдээх диэн итини этэн эрдэхтэрэ. Хор, үчүгэй үлэһит диэн итинник ээ. Эппит тылыгар турар, хаачыстыбалаахтык оҥорор, киһиэхэ болҕомтолоох сыһыаннаах. Өҥөнү оҥорор дьон итини хаһан өйдүүллэрэ буолла?
Биэтэс Билээхэп, edersaas.ru