«Бигэ» аныгы технологиянан салгыны аһардыбат, түүнүктэн, микробтан харыстыыр, анал патеннарынан уонна сертификаттарынан бигэргэммит кыраасканы уонна лааҕы оҥорор, Уһук Илиҥҥэ биир бөдөҥ хампаанньа буола үүннэ.
Өрөспүүбүлүкэ тутар хампаанньаларын, тутууга сыһыаннаах тэрилтэлэрин барыларын кытары ыкса үлэлиир. Былырыыҥҥы сыл түмүгүнэн 42 мөл. солк. суумалаах 584 туонна бородууксуйаны оҥорон таһаарда, өрөспүүбүлүкэ хааһынатыгар 3 мөл. солк. нолуогу киллэрдэ.
Бэс ыйын саҥатыгар Москваҕа буолан ааспыт «Инжиниринг Россия экономикатыгар» конференцияҕа билиҥҥи уустук кэмҥэ олохтоох оҥорон таһаарар тэрилтэлэри сайыннарыы тула киэҥ кэпсэтии тэриллибитэ. Онно ситиһиилээхтик кыттан, «Бигэ» хампаанньа «Инжиниринг эрэгийиэннээҕи киинин чэрчитинэн олоххо киллэриллибит ситиһиилээх бырайыак» номинация лауреата буолбута. Аан дойду таһымнаах экспертэр уонна исписэлиистэр Саха сирин хампаанньатын инвестиционнай-инновационнай кыаҕын, бородууксуйатын хаачыстыбатын үрдүктүк сыаналаабыттара, арҕаа дойдуларга оҥоһуллубут лаахтан-кырааскаттан туох да итэҕэһэ суоҕун, олохтоох усулуобуйаҕа (холобур, тымныыга, сииккэ) сөп түбэһэринэн өссө ордугун билиммиттэрэ.
Үүммүт нэдиэлэ хампаанньаҕа үчүгэй түбүктэн саҕаланна – үөрүүлээх быһыыга-майгыга саҥа собуотун үлэҕэ киллэрдэ.
Бырабыыталыстыба Бэрэссэдээтэлэ Евгений Чекин:
— Бу бырайыак урутаан сайдыы «Хаҥалас» индустриальнай паарка» чэрчитинэн олоххо киирдэ. Өрөспүүбүлүкэ бырабыыталыстыбата Дьокуускай куорат дьаһалтатын уонна Уһук Илин сайдыытын корпорациятын кытары урутаан сайдыы түбэтин (УСТ) тэрийиигэ кэлим үлэни ыытар. Соторутааҕыта өрөспүүбүлүкэ баһылыга Егор Борисов кыахтаах инвестордары тардар туһугар индустриальнай паарка туһанылла илик иэннэрин куонкуруска таһаарарга этэн турар. Ону таһынан, чугастааҕы кэмнэргэ «Хаҥалас» УСТ үлэтин-хамнаһын сүрүннүүргэ, тэрийэр, салайар уонна суот-сокуон өттүнэн ырычаахтарын тупсарарга анал дьаһаллар ылыллаллара былааннанар. Билигин манна уон резидент бэйэлэрин инвестбырайыактарын олоххо киллэрэргэ үлэлии-хамсыы сылдьаллар, резидент статуһун ыларга 23 сайаапка эбии киирдэ. Сайаапкаларынан чааһынай бизнес үбү угуута 5 млрд. солк. тиийдэ, барыта 1 тыһ. үлэ миэстэтэ тахсыахтаах. Сайдыы 2028 сылга диэри барылын быһыытынан, УСТ эйгэтэ кэҥэтиллэн, Хаҥалас, Мэҥэ-Хаҥалас уонна Нам улуустарын сирдэрэ хабыллыахтаах. «Хаҥалас» индустриальнай паарканы кэлим тутуу эрэгийиэн инновационнай сайдыытыгар төһүү буолуоҕа.
Раиса СИБИРЯКОВА. “Саха сирэ” хаһыат, edersaas.ru