Бу күннэргэ социальнай ситимнэргэ биир кэлим эксээмэн тохтуур, уруккулуу систиэмэ киирэр үһү диэн сурах тарҕанна. Ол эрээри, бу, сэрэйиллибитин курдук, сымыйа сурах буолан биэрдэ. edersaas.ru
Тиэкискэ биир кэлим эксээмэни тохтотуу маны толкуйдаабыт дьон сирэйдэрин “хараардыбат” туһугар, биллибэтинэн-көстүбэтинэн, сыыйа киириэҕэ диэн ис хоһоонноох суруллубут этэ.
Биир кэлим эксээмэни тохтотуохтара дуо диэн СӨ үөрэҕин уонна наукатын миниистирин бастакы солбуйааччы Феодосия Габышеваттан туоһуласпыппытыгар маннык хоруйдаата: “2000 сылтан саҕалаан Москватааҕы судаарыстыбаннай университет ректора Виктор Садовничий биир кэлим эксээмэни тохтотор туһунан этии көтөҕөр. Билиҥҥитэ эксээмэн тохтуур диэн ханна да этиллэ илик. Сыллата хонтуруоллуур-кээмэйдиир матырыйааллары (КИМ) эрэ тупсаран иһэллэр. Тылынан чааһыгар ирдэбил эбиллэр, бэлэм хоруйдаах садаанньалар (тест) көҕүрүүллэр”.
Онон батсаабынан тарҕанар хас биирдии сураҕы ылынан иһимэҥ. Манна даҕатан эттэххэ, булгуччулаах биридимиэттэри элбэтэр туһунан былаанныыллар.
Людмила ПОПОВА, edersaas.ru