«Биир кэлим реестргэ түргэнник киирбэтэххинэ, көмө харчыттан матыаҥ…»

Бөлөххө киир:

Бу күннэргэ батсаап ситимигэр тыа хаһаайыстыбатынан дьарыктанар тэриллиилэргэ уонна биирдиилээн кэтэх, бааһынай хаһаайыстыбалаах дьоҥҥо туһаайан «Биир кэлим реестргэ б. дь. сэтинньи 20 күнүгэр диэри турбатаххытына, кэлэр сылга субсидия ханнык баҕарар көрүҥүттэн матаҕыт» диэн куттуур ис хоһоонноох сурах тарҕанна. Өссө «МФЦ-га 3 мөһөөҕү төлөөн халбаҥнаабат баайгытын-дуолгутун туоһулуур выписка ылыахтааххыт» диэн суоһурҕанар тыллардаах. Төһө олохтооҕуй бу?

edersaas.ru


СӨ Тыатын хаһаайыстыбатын уонна ас-үөл бэлиитикэтин министиэристибэтэ б. дь. балаҕан ыйын 21 күнүгэр «Тыа хаһаайыстыбатыгар үлэлиир субъектары Биир кэлим реестргэ киллэрии бэрээдэгин туһунан» 679-с №-дээх бирикээһи таһаарбыта. Тыа хаһаайыстыбатын иһитиннэрэр-сүбэлиир киинин ырытааччыта Мария Саввина тустаах бирикээс сүнньүнэн үлэ ыытылла турарын, бу күҥҥэ 186 хаһаайыстыба график быһыытынан сайабылыанньа туттарбытын, кэлэр нэдиэлэттэн министиэристибэ иһинэн тэриллибит анал хамыыһыйа докумуоннары сүүмэрдиир көрүүнү саҕалыырын эттэ.

Мария Александровна быһаарарынан, Биир кэлим реестргэ киирэргэ министиэристибэ бигэргэппит формалаах сайабылыанньатын кытта субъектар (киэптэринэн, кээмэйдэринэн, аналларынан 8 разделга араарбыттар) сүрүннээн 2-лии былаанканы толороллор. Холобур, бааһынай (фермер) хаһаайыстыба персональнай дааннайдарга сөбүлэҥин биэрэр уонна үлэтин хайысхатыттан көрөн бүтэһик отчуоттанар кэмҥэ федеральнай статистистическай кэтээн көрүү толоруллубут формаларын куоппуйатын туттарар. Оттон кэтэх хаһаайыстыбалаах ыал персональнай дааннайдарга сөбүлэҥин, хаһаайыстыбаннай кинигэттэн сүөһүлээҕин, сирдээҕин, тиэхиньикэлээҕин бигэргэтэр куоппуйаны кытта муниципальнай тэриллии сүөһүнү иитии салаатын сайыннарыыга субсидия көрөрүн туһунан быраап аактатын (уураах, дьаһал) куоппуйатын эбэтэр кирэдьиит (иэс) ылбытын толуйтарарга киирсэр буоллаҕына, кирэдьиит (иэс ылыы) дуогабарын куоппуйатын тиксэриэхтээх.

Манна кыбытан эттэххэ, тыа хаһаайыстыбатын потребительскай кэпэрэтиибиттэн эрэ тыа хаһаайыстыбатын кэпэрэтииптэрин ревизиялыыр сойууһугар чилиэн буоларын туоһулуур докумуон уонна ревизия түмүгүн куоппуйалара ирдэниллэр. Халбаҥнаабат баай-дуол судаарыстыбаннай реестриттэн, нолуок сулууспатыттан уонна статистика кэмитиэтиттэн (урут статотчуот ирдэниллэр буоллаҕына, ол тохтотуллубут) чопчу хаһаайыстыбаҕа сыһыаннаах выпискалары хамыыһыйа сэкирэтээрэ биэдэмистибэлэр икки ардыларынааҕы электроннай бииргэ дьайсыы тиһигиттэн ылар.

Онон харчы төлөөн туран докумуон хомуйсар туһунан этии – хойгур дойҕох эбэтэр дьону бутуйа сатааһын. Оттон болдьоҕун туһунан эттэххэ, ким кими даҕаны ыгылыппат, күһэйбэт: 2018 сылга субсидияҕа тиксэргэ быйылгы сыл иһинэн Биир кэлим реестргэ киирэ сатыахха наада. Мария Саввина билинэринэн, суол-иис хаайан, бытаарыы баар. Ол гынан баран, ким судаарыстыба өйөбүлүгэр суоттанар – суһаллык дьаһаныах тустаах. Бу туһунан улуустардааҕы тыа хаһаайыстыбатын управлениелара, нэһилиэктэр тыа хаһаайыстыбатыгар исписэлиистэрэ уонна хаһаайыстыбалар салайааччылара бары билэн олороллор уонна үлэни ыыталлар. Онон долгуйарга, дьаахханарга төрүөт суох. Ким дьиҥ-чахчы үлэлиир – ол өйөбүлгэ син биир тиксиэ.

Василий НИКИФОРОВ, «Саха сирэ» хаhыат, edersaas.ru

+1
0
+1
0
+1
0
+1
0
+1
0
+1
0
+1
0