Бэҕэһээ “Биир ньыгыллар” конференцияларыгар баартыйа аатыттан Ил Дархан быыбарыгар Айсен Николаевы туруордулар.
Баартыйа конференцияҕа быыбарга кыттыан баҕалаах үс кандидаты көрдө. Кандидат быһыытынан Айсен Сергеевиһы таһынан Норуот фронун Саха сиринээҕи салаатын салайааччыта Валерий Лютай уонна Ил Түмэн дьокутаата, “Эдэр гвардия” лидерэ Александр Сусоев турбуттара. Кистэлэҥ куоластааһын түмүгүнэн, Айсен Николаевка – 90, Валерий Лютайга – 3, Александр Сусоевка – 3 киһи куоластаата.
Айсен Николаев ыам ыйыттан Ил Дархан эбээһинэһин быстах кэмҥэ толорооччунан үлэлии сылдьар. Айсен Сергеевич конференция кэмигэр билигин өрөспүүбүлүкэ тирээн турар кыһалҕаларын быһаарыыны таһынан, Саха сирин сайдыытыгар ураты көрүүлээҕин эттэ. Бу эппитэ барыта кини быыбарга кыттар бырагырааматыгар тиһилиннэ. “Бу бырагыраама норуот бырагыраамата буолуохтаах. Саха сирин хас биирдии олохтооҕо манна бэйэтин санаатын, этиитин киллэриэн сөп. Сахабыт сирэ сайдыытыгар бары куолаан кыттыһыаҕыҥ”, — диэн бэлиэтиир кини. Бырагырааманы конференция кэмигэр ылыннылар.
Санатан эттэххэ, билиҥҥи туругунан, Ил Дархан быыбарыгар “коммунистар” Виктор Губаревы, “либерал-демократтар” Гаврил Парахины туруордулар. Ону сэрг, Быыбар киин хамыыһыйатыгар Нерюнгритааҕы сэбиэт дьокутаата Александр Силин докумуонун биэрбитэ. Бүгүн “сиэрдээхтэр” мунньахтара буолуохтаах.
Аграфена КУЗЬМИНА, “Саха сирэ” хаһыат.