Ыаллыылар аан дойдутааҕы күннэригэр, ыам ыйын 26-гар, “Биир ньыгыл Арассыыйа” баартыйа “Управдом” бырайыагын өрөспүүбүлүкэтээҕи уопсастыбаннай сэбиэтэ Дьокуускай куорат Мархатыгар субуотунньук тэрийдэ. Онно Мелиоратордар уулуссаларын олохтоохторо көхтөөхтүк кытыннылар.
Роман Попов, “Саха сирэ” хаһыат, edersaas.ru
Субуотунньукка Михаил Юмаев салалтатынан управа бэрэстэбиитэллэрэ итиэннэ Уопсастыбаннай сэбиэт чилиэннэрэ үлэлээтилэр.
Бырайыагы сүрүннээччи Юрий Садовников маннык тэрээһиннэри куорат бары микро-оройуоннарыгар, дьиэлэр тэлгэһэлэригэр ыытарга этэр. Оттон Марха дьахталларын сэбиэтин бэрэссэдээтэлэ Светлана Тарабукина сэлиэнньэ олохтоохторо куруутун маннык субуотунньуктары тэрийэллэрин, дьиэлэрин таһын сэргэ Намныыр суол кытыытын хомуйалларын, онтон хас сырыы аайы 300-400 куул бөҕү таһааралларын кэпсиир.
Бу да күн икки чаас устата сүүстэн тахса куул бөҕү хомуйдулар, дьиэлэр тастарыгар сүүрбэ хатыҥ маһы олортулар.
Субуотунньук кыттыылаахтара: “Ыалларбыт дьиэлэрин таһын сыыһырдалларын көрөн хомойобут эрэ. Бэйэбит кыһамматахпытына, ким кыһаныай”, —дэһэллэр. “Управдом” уопсастыбаннай сэбиэт чилиэннэрэ олохтоохтору элбэх кыбартыыралаах дьиэлэр сэбиэттэрин хайдах тэрийэргэ, бэрэссэдээтэллэри таларга сүбэ-ама биэрдилэр.
Роман Попов, “Саха сирэ” хаһыат, edersaas.ru
