Сахалыы Бикипиэдьийэ төрүттэммитэ 10 сыла

Ааптар: 
Бөлөххө киир:

Уон сыл анараа өттүгэр Сахалыы Бикипиэдьийэни аан дойду эспиэрдэрэ билинэн, толору бырааптаах туспа бырайыак буолбута.

edersaas.ru

Ол иннинэ, 2006 сыл ахсынньытыттан Биики Инкубаатар диэҥҥэ балтараа сыл кэриҥэ “төрүүргэ” бэлэмнэммитэ. Онон биикиһиттэр ыам ыйын 18 күнүн быһаарыы ылыныллыбыт уонна ыам ыйын 26 көспүт күнүн Бикипиэдьийэ төрөөбүт күнүнэн ааҕаллар.

Оччоттон баччаҕа диэри 11 тыһыынчаттан тахса ыстатыйа сурулунна. Бу ыстатыйалар тиэмэлэрэ олус киэҥ, ол эрээри бырайыак киэн туттуутунан ханна да суох, сахаҕа сыһыаннаах информация манна түмүллэ сытара уонна ону ким баҕарар хаһан баҕарар көрөр, билсэр кыаҕа буолар.

Ыстатыйалары көннөрү дьон суруйаллар, олор истэригэр учууталлар, быраастар, устудьуоннар бааллар. Бэл диэтэр, оскуола оҕото кытта суруйар. Суруйуу босхо, кыттааччы бэйэтин дьиҥнээх аатын этиэн баҕарбат буоллаҕына, ыйымыан эмиэ сөп.

Бикипиэдьийэни тэҥэ икки сахалыы бырайыак сайда турар: Бикитиэкэ уонна Биики Домох. Бикитиэкэ диэн айымньылар хомуурунньуктара. Манна хоһооннор, кэпсээннэр, олоҥхолор бааллар. Оттон Биики Домох диэн сахалыы өс хоһооннор уонна айымньылартан, хаһыат ыстатыйаларыттан быһа тардыылар киирэр саайтара. Маны эмиэ, бэйэлэрин баҕаларынан суруйар дьон угаллар.

edersaas.ru саайтка анаан Сахалыы Бикипиэдьийэ сүрүн дьаһабыла Ньукулай ПАВЛОВ – Халан.

+1
0
+1
0
+1
0
+1
0
+1
0
+1
0
+1
0