close
Биллиилээх мадьыны Анатолий Баишев баабыйдар күрэстэрин тэрийэн ыытар...
Дьулуур - Олох-дьаһах

Биллиилээх мадьыны Анатолий Баишев баабыйдар күрэстэрин тэрийэн ыытар

Кэлэр өрөбүлгэ, олунньу 18 -гар, Дьокуускайга спорду сэҥээрээччилэри өссө биир сонун күрэхтэһии күүтэр. Бу күн “Триумф” Спорт киинигэр мас тардыһыытыгар Арассыыйа, Европа, аан дойду чөмпүйүөнэ, спорт бочуоттаах маастара, Амма ааттааҕа Анаталий Баишев бирииһигэр өбүгэ оонньуутугар турнир ыытыллар. edersaas.ru

Аны сайын Аммаҕа ыытыллар Саха сирин норуоттарын VII Спортивнай оонньууларыгар анаммыт күрэскэ Айсен Спиридонов (Мэҥэ Хаҥалас), “Чөмпүйүөн Кубогын” боруонса призера Николай Матаннанов (Таатта), “Дыгын оонньууларын” призера Алексей Козлов (Усуйаана), “Орто Бүлүү Боотура” күрэс кыайыылааҕа Николай Текеянов (Бүлүү), мас тардыһыытыгар аан дойду чөмпүйүөнэ Павел Черноградскай (Дьокуускай) кытталларын номнуо биллэрэн олороллор. Амма улууһун аатыттан армлифтингэ аан дойду үрүҥ көмүс призера Игорь Кондаков уонна Анатолий Баишев төрөппүт уола, мас тардыһыытыгар спорт маастара Егор Баишев күрэс былдьаһарга ох курдук оҥосто сылдьаллар.

Күрэстэһээччилэр «Сыарҕа соһуутугар» (ыараханы ханаатынан 30 м ыраахха соһууга), «Амма таастарыгар» (50-100 кг ыйааһыннаах биэс тааһы анал долбуурдарга уурталааһыҥҥа), «Илии күүһүгэр» (70 см уһуннаах, 1 см суоннаах биэс тимир боробулуоханы өҕүлүннэриигэ), «Балаҕан нөҥүө тааһы быраҕыыга» (16 кг киирэни 50 м тэйиичи сиртэн 2 м үрдүктээх былааҥка нөҥүө быраҕыыга) итиэннэ «Таас көтөҕүүтүгэр» куоталаһыахтара.

Тэрийээччилэр иһитиннэрбиттэринэн, кыайыылаах 200 тыһыынча солкуобайынан биһирэниэҕэ. Иккис, үһүс буолбуттар туһааннааҕынан 150, 100 тыһыынчаны ылыахтара.

Күрэхтэһии сүрүн судьуйатынан Иван Горохов, сүрүн сэкирэтээринэн Андриан Захаров үлэлиэхтэрэ. Күрэскэ кыттыан баҕалаахтар олунньу 15-гэр диэри сайаапкаларын Манчаары Баһылай аатынан спорт национальнай көрүҥнэрин киинигэр ыытыахтарын син: Дьокуускай, Киров уул., 20/1, тел/факс: 34-12-04, эл. аадырыс: modun@mail.ru ГБУ РС(Я) «РЦНВС им.В. Манчаары».

Киирии билиэтинэн Амма өрүс кытылыгар турар сэттэ уһаайба, туристическай путевкалар, СКС карабин, МР-155 булт саата, норка саҕынньах, Амма минньигэс дьэдьэниттэн барыанньа, о.д.а. оонньонуохтара. Билиэт сыаната – 1 000 солкуобай.

 

Күрэхтэһии бырагыраамата

Олунньу 18 күнэ, өрөбүл

10:00-11:00 – «Сыарҕа соһуута»

11:00-11.30 – күрэхтэһиини үөрүүлээхтик арыйыы

11:30-13:00 – «Амма таастара»

13:00-14:00 – тохтобул

14:00-16.30 – «Илии күүһэ», «Балаҕан нөнүө тааһы быраҕыы», «Таас көтөҕүүтэ».

Роман Попов, “Саха сирэ” хаһыат, edersaas.ru

#бүгүн: 1
1
0

Сайт матырыйаалларын ааптар көҥүлэ суох ылар бобуллар.