Биллиилээх сэбиэскэй, партийнай диэйэтэл Максим Аммосов аччыгый кыыһа – Лена Аммосова 80 сааһын туолла

Бүгүн, балаҕан ыйын 12 күнүгэр, биллиилээх сэбиэскэй, партийнай диэйэтэл Максим Аммосов кыра кыыһа – Лена Аммосова 80 сааһын бэлиэтиир.

Лена Максимовна 1937 сыл балаҕан ыйын 12 күнүгэр Фрунзе куоракка (билиҥҥи Бишкек) күн сирин көрбүтэ. Оччолорго аҕата Максим Кирович Аммосов баартыйа Фрунзетааҕы горкомун бастакы сэкирэтээринэн үлэлиирэ, кэлин Киргизия КП Киин кэмитиэтин салайбыта.

Лена Максимовна Москватааҕы химия технологиятын институтун бүтэриэҕиттэн олоҕун наукаҕа анаабыта, өр сылларга С.А. Векшинскэй аатынан вакуум тиэхиньикэтин научнай-чинчийэр институтугар үлэлээбитэ. Кини химия билимин хандьыдаата, 40-тан тахса үлэ ааптара.

1989 сыллаахтан кини ийэтэ, Раиса Израилевна, сүбэтинэн аҕата көмүллүбүт сирин көрдөөһүнүнэн дьарыктаммыта. Бииргэ төрөөбүттэрэ Алялаах Яна Максим Кирович үлэлэрин чөмчөтүүнэн, бэчээттээһининэн дьарыктаммыттара, Дьокуускайга, Намҥа, Хатырыкка аҕаларыгар анаммыт түмэллэри тэрийиигэ көмөлөспүттэрэ.

Лена Максимовна Арассыыйа, Киргизия архыыптарыгар үлэлээбитэ. 1992 сыллаахха архыыптан Максим Кирович силиэстийэлэммит дьыалатын, төрөппүттэрин үтүө аатын төнүннэриигэ сыһыаннаах докумуоннары ылары ситиспитэ.

2000 сыллаахха, Лена Максимовна Саха Өрөспүүбүлүкэтин салалтатын кытта бииргэ үлэлээһинин түмүгэр, Москваҕа Максим Кирович сэттэ соратнигын кытта бииргэ көмүллүбүт сирэ чуолкайдаммыта.

Кини 2000 сыллаахха М.К. Аммосов аатынан пуонданы тэрийбитэ.

Лена Максимовна СӨ норуотун хаһаайыстыбатын үтүөлээх үлэһитэ, СӨ М.К. Аммосов аатынан Судаарыстыбаннай бириэмийэтин лауреата, СӨ Ил Дарханын бириэмийэтин лауреата, Саха Өрөспүүбүлүкэтин, Нам улууһун, Хатырык нэһилиэгин бочуоттаах олохтооҕо.