close
“Биир кэлим эксээмэҥҥэ үлэлээбит педагогтарга хамнас бу иннинэ даҕаны ааҕыллара”...
Кыһа - Олох-дьаһах

“Биир кэлим эксээмэҥҥэ үлэлээбит педагогтарга хамнас бу иннинэ даҕаны ааҕыллара”

Сарсыҥҥыттан, ыам ыйын 28 күнүттэн биир кэлим эксээмэннэр саҕаланаллар. Өскөтүн үөрэнээччилэр “эксээмэммин этэҥҥэ туттарбыт киһи” диэн долгуйар эбит буоллахтарына, эксээмэҥҥэ үлэлиир педагогтары көлөһүммүт төлөнүө дуо диэн боппуруос толкуйдатар буолуохтаах.

edersaas.ru

Эксээмэҥҥэ үлэлиир учууталлар уоппускаҕа барбыппыт үрдүнэн, салалта булгуччу кыттыахтааххыт диэн хамнаһа суох үлэлэтэллэр диэн үҥсэргииллэрин элбэхтэ истибиппит. Быйыл ити боппуруос хайдах быһаарыллыаҕын туһунан СӨ үөрэҕин уонна наукатын миниистирин бастакы солбуйааччы Феодосия Габышеваттан туоһуласпыппытыгар маннык хоруйдаата:

Тустаах боппуруос былырыыҥҥа диэри мөккүөрдээх этэ. 237 -дээх Саха Өрөспүүбүлүкэтин дьаһала тахсыбыта. Ол дьаһалынан туспа харчы көрүллэр, методиката суруллан турар. Дьаһалы сыныйан ааҕыахтарын, харчы суумата төһөтүн, хайдах быһыылаахтык төлөнөрүн миэстэтигэр билсиэхтэрин наада. Бэйэлэригэр техническэй үлэһит суох түгэнигэр атын дьону үлэлэтэллэр, оччоҕо дуогабар быһыытынан эмиэ төлөнөр, — диэн Сахамедиа ыыппыт “төгүрүк остуолун” кэмигэр эттэ.

Судургутук быһаарар буоллахха, урукку сылларга даҕаны эксээмэҥҥэ үлэлээбит педагогтарга төлөнөр эбит. Ол эрээри, нууччалыы эттэххэ “источниктара” уларыйбыт. Эксээмэҥҥэ үлэлээбит харчылара хамнаһы дуу, уоппусканы дуу кытта ааҕыллыбакка, туспа методиканан көрүллэр буолбут.

Комсомольскай правда” саайтыгар сурулларынан:

53 % эрэгийиэҥҥэ учууталлар биир кэлим эксээмэҥҥэ (ЕГЭ) үлэлээбиттэрэ төлөммөт.

5 % эрэгийиэҥҥэ аудитория иһигэр үлэлиир дьоҥҥо төлөнөр (холобур, көмпүүтэри бэлэмниир, бланкалары бэрийэр үлэһиттэргэ төлөммөт).

17 % эрэгийиэҥҥэ төлөбүр туһунан балаһыанньа суох эбэтэр ол ис хоһооно биллибэт.

25 % эрэгийиэҥҥэ биир кэлим эксээмэҥҥэ үлэлээбиттэргэ көлөһүннэрэ аахсыллар.

Людмила ПОПОВА, “Саха сирэ” edersaas.ru

#бүгүн: 1
3
0

Сайт матырыйаалларын ааптар көҥүлэ суох ылар бобуллар.