Үөрэҕи уонна науканы кэтээн көрөр федеральнай сулууспа көҕүлээһининэн, бэҕэһээҥҥиттэн Бүтүн Арассыыйатааҕы “Төрөппүттэр БКЭ-ни туттарар биир күннэрэ” аахсыйа саҕаланна. Саха сирэ аахсыйаҕа эмиэ кытынна. edersaas.ru
Тэрээһин оскуоланы бүтэрээри сылдьар оҕолордоох төрөппүттэргэ эксээмэн бэрээдэгин туһунан көрдөрөр, төрөппүттэр уонна оҕолор ыгылыйыыларын, айманыыларын уҕарытар соруктаах.
Саха сиринээҕи аахсыйаны СӨ үөрэҕин уонна наукатын миниистирэ Владимир Егоров бэйэтинэн саҕалаата. Ол курдук, атын төрөппүттэри сэргэ нуучча тылыгар биир кэлим эксээмэни (ЕГЭ) туттарда итиэннэ саамай үрдүк баалы ылла.
Аахсыйаны өйүүр инниттэн СӨ култууратын уонна духуобунай сайдыытын миниистирин солбуйааччы Марина Силина, СӨ Киһи быраабын көмүскүүр боломуочуйалаах тэрилтэ бэрэстэбиитэллэрэ, уопсастыбаннай тэрилтэлэр салайааччылара, чилиэннэрэ, дьокутааттар, биллиилээх спортсменнар, суруналыыстар кэлэн биир кэлим эксээмэни туттардылар.
Кинилэр толорбут үлэлэрин биир кэлим эксээмэн нуучча тылыгар хамыыһыйата көрдө. Экспертэр, эксээмэн туттарбыт дьон 53,9 % букатын алҕаһа суох суруйбуттарын эттилэр. Итиэннэ өйтөн суруйууга тылларын баайа киэҥин, тиэкиһи сөпкө өйдүүллэрин, ис хоһоонун лингвистическэй өттүнэн анаалыстыыллара үчүгэйин бэлиэтээтилэр.
Оттон кыттааччылар биир кэлим эксээмэн туһунан санааларын уларыппыттарын, садаанньа олус уустуга суоҕун ыйдылар. Хас биирдии оҕо эксээмэҥҥэ эппиэтинэстээхтик сыһыаннастаҕына туттарар кыахтааҕын ыйдылар. Ол инниттэн төрөппүттэр оҕолоргутун өйөөҥ диэн сүбэлииллэр.
Санатан эттэххэ, “Төрөппүттэр БКЭ-ни туттарар биир күннэрэ” аахсыйа өрөспүүбүлүкэ хас биирдии улууһугар олунньу 28 күнүгэр диэри ыытыллыаҕа.
СӨ Үөрэҕин уонна наукатын пресс-сулууспата.