Биһиги санаабытынан, буҕаалтырдар диэн — үбү-харчыны, хамнаһы, суоту-учуоту эрэ ааҕар үлэһиттэр. Оттон, өссө сэби-сэбиргэли сатабыллаахтык туттар, эт-хаан өттүнэн эрчиллиилээх, утарылаһааччыны чыпчылҕан түгэҥҥэ охторор кыахтаах буҕаалтырдар эмиэ бааллар.
Үбү-харчыны кытта «өрө тустар» оннук үлэһиттэр өрөспүүбүлүкэ холуобунай-исполнительнай систиэмэтигэр бааллар. РФ Накаастабылы толорор федеральнай сулууспатын Саха сиринээҕи управлениетын пресс-сулууспата иһитиннэрбитинэн, бу подразделениеҕа 100-кэ киһи үлэлиир.
Быйыл, от ыйын 6 күнүгэр, Россия Накаастабылы толорор федеральнай сулууспатын үбү-харчыны кытта үлэлиир салаата 100 сылын бэлиэтиир.
Бу салаа испэсэлиистэрин соруктарынан учреждениелары үбүнэн-харчынан хааччыйыыны тэрийии, бүддьүөттэн кэлбит харчыны кэмигэр аттарыы, ону тэҥэ, ол кэлбит харчыны көдьүүстээхтик уонна сыалыгар туттулларын хонтуруоллааһын буолаллар.
Ону таһынан, үп-харчы хаамыытын салайыы, ороскуоттар-дохуоттар сметаларын бэлэмнээһин, үлэһиттэр уонна буруйдарын боруостааччылар хамнастарын ааҕыы итиэннэ биэнсийэнэн хааччыйыы боппуруостарын толоруу эмиэ сүрүн соруктарга киирэллэр.
Ол эрэн, ити эбээһинэстэрин таһынан кинилэр погоннаах буҕаалтырдар буолалларынан, охсуһуу бойобуой приемнарын, бэстилиэтинэн ытыы нормативтарын толороллор, учреждениелар эбийиэктэрин харабыллааһыҥҥа дьуһуурустубалыыллар, уйулҕаларын туругун бэрэбиэркэлиир тестээһини бараллар.
Биһиги корр., «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи управлениетын пресс-сулууспата.
