Тохсунньу 9 күнүгэр, Үөһээ Бүлүүтээҕи тэлэбиидэнньэнэн биэрии тиэхиньиическэй киинин электромеханига Николай Малычехоров Боотулуу нэһилиэгиттэн командировкаттан кэлэн иһэн, федеральнай трассаҕа киириигэ Ньурбаттан Дьокуускайга айаннаан испит икки оҕолоох эдэр ыаллар аара суолга массыыналара алдьанан олороллоругар түбэһэн, массыыналарын өрөмүөннээн, улахан үтүө дьыаланы оҥордо.
edersaas.ru
– Киин суолга, быһа холоон, 200 миэтэрэни айаннаабытым кэннэ, суолга кыыстаах уол куоластыы туралларыгар түбэспитим. Тута тохтообутум. Арай көрбүтүм массыына иһигэр икки кыра оҕо чөкөллөн олороллоро. Кинилэри бэйэм массыынабар көһөрбүтүм. Эдэр ыал аҕата Владимир лаппа ыксаабыт көрүҥнээҕэ, эрэмиэннэрэ быстан, мотуордара олорон, массыыналара умуллан, номнуо икки чаас аһаҕас халлааҥҥа олоробут диэн кэпсээбитэ. Дьолго, мин уонна кини массыынабыт биир мотуордаах буолан, саппаас эрэмиэннээх буоламмын, чаас аҥаарыттан ордук кэм иһинэн оҥостон, Хоро нэһилиэгин чайнойугар диэри арыаллаан аҕалтаабытым, – диэн Николай кэпсээтэ.
— Николай, суолга араас бары буолар, барытыгар бэлэм сылдьар наадатын суоппар киһи билэн эрдэҕиҥ. Арай итиннэ саппаас эрэмиэниҥ суоҕа буоллар, хайыаҥ этэй?
– Уһуну-киэҥи толкуйдаабакка, массыынаны хатаан баран, Хоро нэһилиэгэр аҕалан, миэстэлэрин буллартаан, көмө ыҥырыам этэ. Тоҕо эрэ аара массыыналар ааспыттар үһү даҕаны бары Ньурба, Мииринэй диэки айаннаан иһэбит диэн ким да көмө-тирэх буолбатах… Айан дьонугар көмөлөһүү – суоппарга ытык иэс курдук саныыбын. Маннык түбэлтэҕэ бастакыбын түбэстим, правабын быйыл саҥа ылбытым, онон миэхэ соһуччу тургутан көрүү курдук буолла, – диэн бүгүҥҥү күн дьоруойа сэмэйдик кэпсиир.
Күн бэҕэһээ эдэр ыаллар Мариялаах Владимир Дьокуускайтан төннөн иһэн, абыраабыт киһилэригэр уларсык ылбыт эрэмиэннэрин төннөрбүттэр, итиэннэ «аны өрүү саппаас чаастаах сылдьыахпыт» диэн Ньурба ыччата Владимир өссө төгүл махтанарын биллэрбит.
Оҕолор барахсаттар кыралара бэрт буолан, туох алдьархайга түбэһэ сылдьыбыттарын өйдөөбөккө да хааллылар быһыылаах, билбэт киһилэрин массыынатыгар тоҕо олорсубуттарын, тоҕо кинилэргэ сакалаат арааһын бэрсибитин, баҕар, дьонноруттан ыйыппыттара буолуо…
Валентина ДОГОЮСОВА, edersaas.ru