Ыам ыйын 20 күнүгэр алын кылаастарга үөрэнэр “Боотур” кулууп иитиллээччилэрэ сахалыы многоборьеҕа күрэс былдьастылар.
“Дохсун” манежка ыытыллыбыт күрэхтэһиигэ оҕолор биэс көрүҥҥэ куоталастылар: “бэргэн харахха” (мээчигинэн сыалы таба быраҕыыга), “үс төгүл үскэ” (3-4 кылаастар оҕолоро), үстэ төхтүрүэн ойууга (1-2 кылаастар), “тутум эргииргэ”, “халбас харатыгар” (синньигэс ыскамыайкаҕа туран охторсуу), 200 м (1-2 кылаастар), 400 м (3-4 кылаастар) сүүрүүгэ. Күрэхтэһиигэ барыта 42 оҕо кытынна.
Турниры тэрийэн ыыппыт “Боотур” кулууп салайааччыта Иван Белолюбскай кырачаан куоталаһааччылар күрэс былдьаһыы диэн тугун-ханныгын эттэринэн-хааннарынан билбиттэрин, уолаттар харахтара уоттаммытын, күрэстэһии олус хатыһыылаахтык барбытын, хас да көрүҥҥэ тэҥ очукуолаахтарга кыайыылааҕы хаачыстыбанан быһаарбыттарын эттэ. Ордук чорботон “тутум эргииргэ” икки мүнүүтэ иһигэр 51 эргийбит маҥнайгы кылаас үөрэнээччитин Марк Жирковы бэлиэтээтэ, бу улахан дьон таһыма буоларын ыйда.
Сайыҥҥы ыйдарга “Боотур” иитиллээччилэригэр икки түһүмэхтээх эрчиллэр түмсүүлэр ыытыллыахтара.
Роман ПОПОВ, “Саха сирэ” хаһыат, edersaas.ru