Саха Өрөспүүбүлүкэтин борокуратууратыгар пресс-конференция буолла. Манна сыл бастакы аҥаарыгар борокуратуура уорганнарын үлэтин туһунан билиһиннэрдилэр. Суруналыыстар ыйытыыларыгар өрөспүүбүлүкэ борокуруора Николай Пилипчук уонна тутаах отделлар начальниктара хоруйдаатылар.
Биллэрин курдук, борокуруордар олох бары эйгэтин хабан, сокуону тутуһууну хонтуруоллуур, ирдиир эрэ буолбатахтар, сүрүнэ — дьон, биирдиилээн гражданнар интэриэстэрин, бырааптарын көмүскүүллэр.
Дьиэни өлүүлэһэн тутуу. Николай Пилипчук бэлиэтээбитинэн, өрөспүүбүлүкэҕэ бу эйгэҕэ быһыы-майгы уустук: 66 тутар хампаанньа 115 эбийиэги тутар, гражданнар өлүүлэһэн тутууга 9 тыһыынча дуогабар түһэрсибиттэр. Борокуратуура орооһон, 18 кыһалҕалаах эбийиэктэн 9-һун быһаараннар, 207 киһи быраабын көмүскээбиттэр, оттон өссө 9 эбийиэк хонтуруолга сылдьар.
Маныаха ити 9 иһигэр «Северная строительная компания» (биир эбийиэк), «Черов и К» (үс эбийиэк), «Симиир», «Макрос» (Чурапчыга, 5 эбийэк) бааллар. 5 холуобунай дьыала тэриллэн силиэстийэлэнэр. Ол иһигэр, «Товары Саха Якутместпрома» хампаанньаҕа туһуланан эмиэ.
Соторутааҕыта Дьокуускай куорат федеральнай суутугар «Битяй» кооператив тойоно Сергей Дробот дьыалата көрүллэн, кини 10 сылга көҥүлэ быһыллыбыта. Оттон кооператив хаһаайката Людмилы Битяй дьыалата, кини доруобуйатын туруга мөлтөҕүнэн, тохтотуллан турар.
Хамнаска иэһи төлөттөрүү. Бу эйгэҕэ 4,9 тыһыынча кэһиини, 97,5 мөл. солк. харчы (хамнас, уоппуска харчыта, бириэмийэ уо.д.а) төлөнө илигин булбуттар. Борокуруордар туруорсан, 2,9 тыһыынча үлэһит быраабын көмүскээннэр, 88,4 мөл. солк. иэһи төлөттөрбүттэр.
105 дьиссипилиинэ эппиэтинэһигэр тардыллыбыт, 211 киһи — административнай. Биир холуобунай дьыала тэриллибит.
Хоруупсуйаны утары сокуону тутуһууга 2347 кэһиини булбуттар. Бу хайысханан өрөспүүбүлүкэ үрдүнэн 16 административнай дьыала, 94 холуобунай дьыала тэриллибит. Сүрүннээн, бэриги ылыы-биэрии, дуоһунас боломуочуйатынан туһаныы, бүддьүөт харчытын хорон сиэһин.
Буруйу оҥоруу туруга. Сыл бастакы аҥаарыгар 5749 буруйу оҥоруу бэлиэтэммит, ол эбэтэр, ааспыт сыл бу кэмин кытта тэҥнээтэххэ, 3,9 %-нан аҕыйаабыт. Маныаха ураты ыар буруйу оҥоруу элбээбит — 296-тан 417-ҕэ диэри.
Вера Макарова, «Саха сирэ» хаһыат, edersaas.ru
Хаартыскаҕа — өрөспүүбүлүкэ борокуруора Николай Пилипчук.
Ааптар түһэриитэ.