Бу сыл устатыгар борокуруордар хоруупсуйаны утары сокуону тутуһууну хонтуруоллаан, 3 тыһыынчаттан тахса кэһиини буллулар, 300-тэн тахса дуоһунастаах үлэһит дисциплинарнай уонна административнай эппиэккэ тардылынна. Өрөспүүбүлүкэ быраабы араҥаччылыыр уорганнара бу эйгэҕэ 130-тан тахса буруйу буллулар.
Сокуону кэһии, сүрүннээн, муниципальнай сулууспаҕа таҕыста. Ону тэҥэ, сокуону кэмэ суох кэһиини борокуруордар судаарыстыбаннай сулууспа, бүддьүөт туһунан сокуоннары толорууну бэрэбиэркэлээһин кэмигэр буллулар.
Холобура, Алдан борокуратуурата олохтоох салайыныы уорганнарын дьокутааттара хоруупсуйаны утары сокуону тутуһууларын бэрэбиэркэлээбитин түмүгэр, икки дьокутаат 2016 сыллааҕы дохуоттарын, баайдарын-малларын туһунан сибидиэнньэлэри киллэрбэтэхтэрэ биллибит. Борокуратуура туруорсан, бу дьокутааттар итэҕэли сүтэрбиттэринэн, боломуочуйалара тохтообут.
Тус сыаллаах бырагырааммалары олоххо киллэриигэ көрүллүбүт бүддьүөт үбүн-харчытын туттууга эмиэ ураты болҕомто ууруллар. Холобурга, Үөһээ Бүлүү борокуратууратын бэрэбиэркэтин түмүгэр, хааччахтаммыт эппиэтинэстээх уопсастыба салайааччыта улуус дьаһалтатын итэҕэлинэн туһанан, элбэх кыбартыыралаах дьиэ тутан биэриэх буолан, хантараах түһэрсэн баран, өрөмүөн үлэтэ ыытыллыбытын курдук сымыйа сибидиэнньэлэри КС-2 уонна КС-3 аахталарга суруйбут. Ол түмүгэр, муниципалитет уонна өрөспүүбүлүкэ бүддьүөттэригэр 38 мөл. солк. суумалаах хоромньуну оҥорбут. Дьиэ тутуллан бүтэ илик, итинэн дьон бырааба кэһиллибит. Борокуратуура матырыйаалларыгар олоҕуран, бу салайааччыга «Түөкүннээһин» ыстатыйанан холуобунай дьыала тэриллибит.
Быйыл борокуратуура орооһон, үлэлэриттэн уһуллубут киһи ахсаана икки төгүл элбээтэ. Ол курдук, хас да коммерческай тэрилтэ учредителинэн уонна кыттааччытынан сылдьыбыт биир министиэристибэ миниистирин бастакы солбуйааччыта дуоһунаһыттан босхоломмута. Бу бэрэбиэркэ СӨ Ил Дарханын иһинэн Хоруупсуйа хабааннаах уонна да атын быраабы кэһиилэри сэрэтэр управлениены кытта бииргэ ыытыллыбыта.
Хоруупсуйаҕа сыһыаннаах административнай сокуону кэһиини сэрэтиигэ үлэ ситимин быспакка ыытыллар. Итинник кэһии улахан буруйга тиэрдиэн сөбүнэн. Урукку судаарыстыбаннай уонна муниципальнай сулууспалаахтар атын үлэҕэ киирдэхтэринэ, ол тэрилтэ салайааччыта биллэрэр эбээһинэстээх. Ол РФ Административнай кодексатын 19.29-с ыстатыйатынан ирдэниллэр. 28 итинник кэһии булулунна. Олор ортолоругар «Анаабыр алмаастара», «Туймаада Лизинг» уонна да атын тэрилтэлэр бааллар. Ыстараап уопсай сууммата 1,5 мөл. солк. тахса буолбутуттан, 1 мөл. солк. тахсы харчы төлөннө.
Өрөспүүбүлүкэҕэ хоруупсуйаҕа сыһыаннаах хас төрдүс буруй, сокуону кэһии борокуруордар бэрэбиэркэлэрин кэмигэр булуллар.
СӨ Борокуратууратын пресс-сулууспата.
Хаартыска: интэриниэттэн.