Бүгүн өрөспүүбүлүкэҕэ ыытыллар Ийэ күнүн көрсө Ийэ скверигэр үөрүүлээх миитин буолла.
edersaas.ru
Ийэ өйдөбүнньүгэр сибэкки дьөрбөтүн ууруу үөрүүлээх түгэнигэр Ил Дархан Егор Борисов, премьер-миниистир Евгений Чекин, норуот дьокутааттара, бырабыыталыстыба чилиэннэрэ, Дьоруой-ийэлэр, элбэх оҕолоох уонна эдэр ийэлэр, “Арассыыйа ийэлэрэ” (сал. Прасковья Борисова), “СӨ Дьахталлар тэрилтэлэрин сойуустара” (сал. Анжелика Андреева), “Элбэх оҕолоох ийэлэр” (сал. Римма Горохова) уопсастыбаннай түмсүүлэр кыттыыны ыллылар.
— Ил Дархан Егор Борисов бэйэтин эҕэрдэ тылыгар, соҕотоҕун 8 оҕону атахтарыгар туруорбут күн күбэй ийэтин холобурдаан туран: “Бу өйдөбүнньүк мин ийэбин санатар”, — диэн бэлиэтээтэ.
Аҕа баһылык судаарыстыба ийэлэргэ туох чэпчэтиини оҥорорун туһунан санаатын тиэртэ.
Миитиҥҥэ 4 оҕотун илдьэ кэлбит элбэх оҕолоох эдэр ийэ Ньургуйаана Заморщикова: «Ийэ сүрүн соруга — оҕо иитиитэ. Ол эрээри биһиги, онон эрэ муҥурдаммакка, уопсастыбаннай үлэҕэ көхтөөтүк кыттабыт. Мин урбаанньыт быһыытынан дьоҥҥо хайа кыалларынан элбэх үлэ миэстэтин таһаарарга дьулуһабын. Биһиги үлэлиирбитигэр судаарыстыба сөптөөх усулуобуйаны тэрийэрин иһин Ил Дархаҥҥа өрөспүүбүлүкэ ийэлэрин ааттарыттан барҕа махталбын тиэрдэбин», — диэн санаатын үллэһиннэ.
Саха сиригэр Ийэ күнүнэн сибээстээн, өрөспүүбүлүкэбитигэр алтынньы 15 күнүттэн сэтинньи 26 күнүгэр — Арассыыйа ийэлэрин күнүгэр диэри араас ис хоһоонноох тэрээһиннэри ыытыахпыт, — диэн кэпсиир Ыччат дьыалаларыгар уонна дьиэ кэргэн бэлиитикэтигэр миниистири солбуйааччы Савва Михайлов.
Кэлэн иһэр Ийэ күнүнэн, күндү Саха сирин дьахталлара!
Елена ПОТОЦКАЯ, «Саха сирэ» хаһыат, edersaas.ru
Василий Кононов хаартыскаҕа түһэриитэ.