close
Бу түүн артыыстарбыт Берлиҥҥэ кыһыл көбүөрүнэн хаамыахтара...
Култуура - Олох-дьаһах

Бу түүн артыыстарбыт Берлиҥҥэ кыһыл көбүөрүнэн хаамыахтара

Бүгүн түүн Берлинале  киинэ аан дойдутааҕы бэстибээлин сүрүн бырагыраамата саха артыыстара оонньообут “Ага” киинэлэринэн түмүктэниэҕэ.

М.Апросимов

 edersaas.ru

Болгария режиссера Милко Лазаров 2017 с. олунньуга-муус устарга Саха сиригэр “Ага” (оробуочай аата “Нанук”) киинэни  Red carpet  киинэ хампаанньатын, француз уонна немец кинематографистарын кытары устубута. Киинэҕэ саха артыыстара: Ойуунускай аатынан Саха тыйаатырын артыыһа Михаил Апросимов, Амма улууһуттан сылдьар Феодосия Иванова, Олонхо тыйаатырын артыыската Галина Тихонова, Сергей Егоров, Афанасий Кылаев уо.д.а. оонньообуттара.

Г. Тихонова

Артыыстарбыт номнуо Берлиҥҥэ тиийэн, бэстибээл кыһыл көбүөрүн устун хаамыахтара. Ол кэмҥэ Моисей Кобяков ырыата тыаһыаҕа.

Бэстибээл туһунан киинэ продюсера, «Саха киноклуб» салайааччыта, Олоҥхо тыйаатырын аан дойдутааҕы отделын салайааччыта Сардаана Саввина маннык кэпсээтэ:

– “Ага” киинэ тоҕо сүрүн куонкуруска көрдөрүллүбэтин бары ыйыталлар. Ол да буоллар, бу киинэни олус күүтэллэрин туһунан этэллэр. Туох да диэбит иһин, маннык улахан бэстибээлгэ күрэстэһэр эбэтэр күрэстэспэт улахан суолтата суох. Киинэбит куонкурус бырагырааматын да сабарын ситиһиинэн ааҕыахха сөп. Киинэни олус интэриэһиргээн күүтэллэр, билиэттэр атыыланан бүппүттэр.

Онон, “Ага” киинэ саха киинэтин историятыгар өссө биир улахан үөрүүлээх түгэнинэн суруллуоҕа. Тоҕо диэтэххэ, саха артыыстара сүрүн дьоруойдары оонньууллар, киинэ сахалыы тылынан английскай субтитрдаах барар. Ону сэргэ, омук хамаандатын кытары Саха сириттэн отучча киһи киинэни устууга кыттыбыта.

Манна саха киинэтин бары билэллэр. Номнуо иккис сылбытын кыттабыт. Инникитин даҕаны биһигини элбэх интэриэһинэй үлэ күүтэригэр уонна салгыы сайдарбытыгар эрэллээхпит.

Саха киинэтин сүрэхтэниитин уонна артыыстарбыт кыһыл көбүөрүнэн хаамалларын бүгүн түүн быһа эфиринэн көрүөххэ сөп:

00:45 — фотокол;

00:55 — пресс-конференция;

05:30 — кыһыл көбүөрүнэн хаамыы.

Киинэни көрөргө Berlinale киириэххэ сөп.

Бу тэрээһини барытын Сардаана Саввина иилээн-саҕалаан ыыта сылдьар.

Надежда ЕГОРОВА,Саха сирэ” хаһыат, edersaas.ru

#бүгүн: 1
2
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

17 − двенадцать =