РФ Үбүн министиэристибэтэ маҕаһыыҥҥа атыыланар буокка муҥутуур кыра сыанатын 190 солк. олохтообута. Онон, мантан кыра сыаналаах буокка куһаҕан хаачыстыбалаах, контрафактнай буолуон сөбүн «Якутия ҮАПК» АУо генеральнай дириэктэрин солбуйааччы Туйаара Алексеева этэр.
Контрафактнай арыгы үгүс өттүгэр куораттарга, ол иһигэр Дьокуускай, Нерюнгри, Мирнэй уонна Алдан урбаанньыттара уора-көстө атыылыыллар. Ааспыт сылга 143 тыһ. 108 лиитирэ куһаҕан хаачыстыбалаах (контрафактнай) арыгыны суох оҥорбуттар. Мантан 25 тыһыынча лиитэрэ аҥардас Дьааҥы Баатаҕайыгар тиксэр.
РФ Ис дьыалатын министиэристибэтин иһинэн үлэлиир тырааныспарга Хотугулуу-Илин линейнэй управлениета бэрэстэбиитэлэ Андрей Зароченцев иһитиннэрбитинэн, бу күннэргэ Нерюнгрига тимир суол станциятыгар «Посуда» диэн накладнойдаах контейнерга кыраадыстаах арыгыны уоран тиэйэн испиттэрин туппуттар. Билигин управление үлэһиттэрэ арыгы акцизнай мааркатын үөрэтэ сылдьаллар.
Хаартыскаҕа көстөр арыгыны Алдаҥҥа оҥоһуллубут дииллэр. Бу арыгы этикеткалаах курдук эрээри бэйэ оҥоһуута. Маннык арыгы көҥүлэ суох кистии-саба «туочукаларга» биитэр массыына үрдүттэн таксига атыыланар. Хайдах сүһүрдэрэ биллибэт. Уора-көстө атыылаһар сэрэхтээх.
Анивера АКИМОВА.