Өрөспүүбүлүкэтээҕи салгын аалын пааркатыгар сүүстэн тахса сөмөлүөт уонна бөртөлүөт араас көрүҥэ баар. Ол гынан баран, мантан аҥаара эрэ көтөр кыахтаах. Аны хоту улуустарга мөлтөх хаачыстыбалаах уматык тиэрдиллэн, сорох хайысхаларынан бөртөлүөт да кыайан көппөт чинчилэннэ.
Анивера АКИМОВА, «Саха сирэ» хаһыат, edersaas.ru
Бүгүҥҥү туругунан «Черскэй», «Среднеколымскай», «Зырянка», «Муома» уонна «Белая Гора» авиа-портарыгар уматык кыһалҕата үөскээтэ. Хоту улуустарга массыынанан кыһыҥҥы өттүгэр эрэ сылдьаллар. Ону даҕаны хаар-тибии түспэтэҕинэ. Бу кыһын хаар өлгөмнүк түһэн, кыһыҥҥы суол аһыллан быстыбатаҕа. Оттон сааскы, сайыҥҥы, күһүҥҥү ыйдарга олохтоохтор көтөр аалынан туһаналлар. Холобур, былырыын күһүн Орто Халымаҕа балаҕан ыйыгар, ардахтаан-хаардаан сорох хайысхаларынан ыйы-ыйдаан сөмөлүөт көппөтөҕө. Хаайтарыы бөҕө буолбута. Аны билигин куһаҕан хаачыстыбалаах уматыктан сылтаан, айаннааччылар кыһалҕаҕа ыктардылар.
Үөскээбит быһыыны-майгыны чопчулаһаары «Аэропорты Севера» ФКТ-га сибээскэ тахса сылдьыбыппытыгар, тэрилтэ уматыгы атыыласпатын уонна атыылаабатын чопчулаан бэлиэтээтэ. Кинилэр анал емкостарга харайар уонна суудуналары сапараапкалыыр эрэ эбээһинэстээхтэр. Уматыгы авиа-хампаанньалар ньиэп хампаанньатыттан бэйэлэрэ атыылаһаллар эбит.
Хоту улуустары авиационнай уматыгынан «Саханефтегазсбыт» АУо хааччыйар. Авиа-хампаанньалар уматыгы атыылаһан баран анал автоцистернанан туһааннаах миэстэлэринэн тиэрдэн биэрэллэр. Хас кэлбит автоцистернаттан уматык боруобатын ыланнар, «Аэропорт ГСМ Сервис» лабораториятыгар ыыталлар эбит.
Куһаҕан хаачыстыбалаах авиационнай уматык туһунан ааспыт ыйга «Сахамедиа» иһинэн үлэлиир «Улуус олоҕо» бырайыак чэрчитинэн ыытыллыбыт төгүрүк остуолга кэпсэтэн турабыт. Онуоха, Тырааныспар министиэристибэтин салгын суолун салаатын начаалынньыгын солбуйааччы Алексей Борисов: «Халыма улуустарыгар уматык баар эрээри, ГОСТ ирдэбиллэригэр эппиэттээбэтэ билиннэ, онон бөртөлүөт сатаан сапараапкаланар кыаҕа суох. Урут «Саханефтегазсбыт» аҕалар уматыгын састааба үчүгэй этэ», – диэн этэр. Куһаҕан уматыктан сылтаан, улуус олохтоохторо ханна да айаннаабакка олороохтообуттар. Дьиҥэр, итини салалта быһаарар кыһалҕата буолуо ээ.
Билигин «Черскэй», «Среднеколымскай», «Зырянка», «Муома» уонна «Белая Гора» авиа-портарыгар баар авиационнай уматык эбии хонтуруолу ааһар. Хаачыстыбата үчүгэйин туһунан пааспары ыллаҕына биирдэ, суудуналар сапараапкаланыахтара. Зырянкаҕа баар уматык хаачыстыбаҕа эппиэттиир аатырда.
Анивера АКИМОВА, «Саха сирэ» хаһыат, edersaas.ru