Быйыл Гражданскай уопсастыба министиэристибэтин граныгар барыта 200-чэкэ бырайыак киирбит. Олортон уопсастыбаннай хамыыһыйа 34 бырайыагы талбыт. Бу туһунан миниистир Сардаана Гурьева кэпсиир.
edersaas.ru
“Ханнык бырайыактар ордук биһирэннилэр диир буоллахха, Саллааттар уонна мотуруостар төрүппүттэрин кэмитиэтэ сулууспа кэмигэр уолаттарга көмө-тирэх буолар, кыһалҕаларын быһаарар сыаллаах бырайыак оҥорон аҕалбыта киэҥ сэҥээриини ылла. Оҕолорго аналлаах бырайыактартан ыллахха, оҕо хамсааһынын өйүүр уопсастыбаннай түмсүү координационнай киини тэрийэр санаалаах. “Чубукулаах” община “Родничок” лааҕыр иһинэн эбээн төрүт үгэһин сайыннарыыга ылсыахтаах. Ону сэргэ, нэһилиэнньэ чөл туруктаах буолуутугар элбэх бырайыак киирдэ. Олортон Таатта улууһун Орто Амма нэһилиэгин “Теплица” түөлбэтэ паарка тутуутугар ылсыбытын, доруобуйаларынан хааччахтаах дьоҥҥо туһулаан инбэлииттэр Россиятааҕы уопсастыбаннай түмсүүлэрэ тренажернай саалаҕа дьарыктаныыга бырайыактарын көмүскээбиттэрин ахтыам этэ”, — диэн этэр Сардаана Михайловна.
Манна даҕатан эттэххэ, уопсастыбаннай түмсүүлэри кытары үлэлэһэр департаментан тэриллиэҕиттэн саҕалаан барыта 150-тан тахса уопсастыбаннай түмсүү судаарыстыбаттан көмө-тирэх ылла.
Сардаана Михайловна бэлиэтииринэн, кэлиҥҥи кэмҥэ граннарга ордук Горнай, Уус Алдан, Мэҥэ Хаҥалас, Нам, Үөһээ Бүлүү, Нерюнгри, Алдан, Өлүөхүмэ, Эдьигээн, Мирнэй, Ленскэй, Хаҥалас, Бүлүү уонна Дьокуускай киирсэллэр. “Кэлиҥҥи кэмҥэ улуустар көхтөөхтүк кыттар буоллулар. Онуоха иккис сылын үлэлиир ресурснай киин төһүү күүс буолла. Бу манна үчүгэй уопуттаах уопсастыбаннай түмсүүлэр киирэллэр”, — диэн этэр миниистир.
Түмүккэ, миниистир грант ылбыт түмсүүлэр бу бырайыактарынан эрэ тохтоон хаалбакка, өссө да саҥа бырайыактары толкуйдаан граннарга кыттар кыахтаахтарын санатар. Онуоха күөн көрсүһүүгэ бэлэм буолуохтарын наада. “Былырыын грант ылбытыҥ, быйыл ылбаккын диэн кими да хааччахтаабаппыт. Этэргэ дылы, ким интэриэһинэй этиилээх, ону олоххо киллэрэбин диир киһи сылын аайы кытта туруон сөп. Бырайыагы анал хамыыһыйа быһаарар. Онон түмсүүлэр күөн көрсүһүүгэ бэлэм буолуохтарын наада, биһиги ресурснай кииммит итиннэ көмө-тирэх буолар”, — диэн бэлиэтиир Сардаана Михайловна.
Аграфена КУЗЬМИНА, “Саха сирэ” хаһыат, edersaas.ru