Бэҕэһээҥҥиттэн Национальнай “Абилимпикс” чөмпүйэнээт эрэгийиэннээҕи сүүмэрдиир түһүмэҕэ саҕаланна. Тустаах чөмпүйэнээт сыллата кэҥээн, кыттааччыта эбиллэн иһэр. Күрэхтэһии алтынньы 10-12 күннэригэр ыытыллар.
edersaas.ru
Профессиональнай компетенциялары сайыннарар киин дириэктэрин солбуйааччы, “Ворлдскиллс” Саха сиринээҕи дириэксийэтин салайааччыта Владислав Хабаров: “Өскөтүн былырыын биэс хайысханан 22 киһи кыттыбыт эбит буоллаҕына, быйыл 8 хайысханан 49 киһи күөн көрсүөҕэ. Ити ааспыт сылга холоотоххо, икки төгүл элбэх. Күрэхтэһии Дьокуускайга уонна Нерюнгрига буолар. Онон икки сиринэн орто профессиональнай үөрэх кыһаларыттан сүүмэрдэммит 30 устудьуон волонтер быһыытынан үлэлэһиэҕэ”, — диэн иһитиннэрдэ.
Күрэхтэһии “сетевой уонна системнэй администрирование”, “экэниэмикэ уонна бухгалтерскай учуот”, “повар дьыалата”, “кондитер дьыалата”, “портной”, “сварочнай технология”, “электромонтаж”, “массыына өрөмүөнэ уонна көрүүтэ-истиитэ” хайысхаларынан барыаҕа. Ол курдук, Дьокуускайдааҕы сервис технологическай техникумун базатыгар 5 компетенцияны, Соҕурууҥҥу Саха сирин технологическай кэллиэһин (Нерюнгри) базатыгар үс компетенцияны хабыахтара.
Бэҕэһээ тэрээһин дьыалабыай бырагырааматын чэрчитинэн, эдэр инбэлииттэри үлэнэн хааччыйыыга “төгүрүк остуол” буолла. Бүгүн Дьокуускайдааҕы сервис технологическай техникумугар 15 чаастан “Профессиональай карьера” диэн үөрэх былаһаакката үлэлиэҕэ. Манна икки бөлөҕүнэн доруобуйаларыгар хааччахтаах устудьуоннарга, үөрэҕи бүтэрбит дьоҥҥо үлэ булалларыгар араас сүбэлэри биэриэхтэрэ, үлэ ырыынагын туһунан кэпсиэхтэрэ, дуоһунаска өрө тахсыыны хайдах былаанныыр туһунан кэпсиэхтэрэ.
Оттон сарсын, алтынньы 12 күнүгэр, күнүс 14 чаастан эмиэ Дьокуускайдааҕы сервис технологическай техникумугар «Абилимпикс» куонкуруһу Саха сиригэр инникитин хайдах тэрийэр туһунан кэпсэтиэхтэрэ.
Биллэн турар, сүрүн тэрээһининэн куонкурус буолар. Онон сарсыҥҥа диэри орто үөрэх кыһаларын устудьуоннара, үөрэҕи бүтэрбит дьон бэйэлэрин маастарыстыбаларын көрдөрүөхтэрэ. Үчүгэйэ диэн, үлэ биэрэр дьон бэйэлэринэн эспиэрдиир буолан, кыттааччылар үлэнэн хааччыллалларыгар кыах үөскүүр. Кыайыылаахтар Саха сирин аатыттан Москваҕа буолар чөмпүйэнээккэ баран кыттар чиэскэ тиксиэхтэрэ.
Ыспыраапка
Абилимпикс — норуоттар икки ардыларынааҕы хамсааһын. Сүрүн сыала – доруобуйаларыгар хааччахтаах дьон (инбэлииттэр) профессиональнай маастарыстыбаларын көрдөрөр, үлэ булалларыгар дьайар куонкурус.
Людмила ПОПОВА, “Саха сирэ” хаһыат, edersaas.ru
Ренат БРОДНИКОВ хаартыскаҕа түһэриитэ.