Саҥа сыл саҥа сонуннары аҕалар. Тохсунньу 2 күнүгэр “РИА-Новости”, “Вести.Ру” уонна да атын сайтар WhatsApp сыһыарыы эргэ төлөпүөннэргэ үлэлээбэт буолуо диэн иһитиннэриини тарҕаттылар.
Ангелина ВАСИЛЬЕВА, “Саха сирэ” хаһыат, www.edersaas.ru
Ол курдук, iPhone 3GS, Windows Phone 7, iOS 6 уонна 2.1 и 2.2 версиялаах Android смартфоннар “бассааба” суох хаалар буолбуттар. WhatsApp сыһыарыыны оҥорооччулар этэллэринэн, ити эргэрбит гаджеттар саҥа уларыйбыт сыһыарыыны кыайбаттар үһү.
Бу төлөпүөннэргэ “бассаап” бастаан 2017 сыл саҥатыгар сүтүө диэбиттэрэ да, кэнники биллибитинэн, бэс ыйын 30 күнүгэр диэри уһаппыттар үһү. Онон ийэлэргит-аҕаларгыт, эбэлэргит-эһэлэргит төлөпүөннэрин бэрэбиэркэлээҥ – аны сайын баҕар, “бассааба” суох хаалар кутталлаахтар.
“Бассаап” хаһаайыттара Daily Express диэн британскай хаһыакка интервью биэрбиттэр. Кинилэр сыһыарыыга саҥаттан саҥа уларыйыылары, эбиилэри киллэрэн иһэллэр. Холобур, соторутааҕыта видео нөҥүө көрөн олорон кэпсэтэр кыах баар буолла.
“Бассаабынан” аан дойду үрдүнэн 1 миллиардан тахса киһи туһанар. Өссө да кэҥээн, тарҕанан иһэр кэриҥнээх. Дьиҥинэн, атын да социальнай ситимнэр бааллар эрээри, ордук табыгастааҕынан дуу, эрдэ тарҕаммытынан дуу, билиҥҥитэ “бассаап” иннин биэрбэт.
Арассыыйа киин регионнарыгар “бассаап” наһаа киэҥник тарҕамматах эбит. Оттон Саха сиригэр, омуннаабакка эттэххэ, “бассаабынан” туһаммат киһи тарбахха баттанар буолуохтаах. Оннооҕор киин тэлэбиидэнньэ үлэһиттэрэ итини сөҕөн, биэрии оҥоро сылдьыбыттара.
Аҕыйах сыл иһигэр кыра оҕотуттан кырдьаҕаһыгар диэри туһанар буоллулар. Хас биирдии киһи уонтан сүүрбэҕэ тиийэ кэпсэтэр “бөлөхтөөх”. Сарсыардабыт сонуну ааҕыыттан саҕаланар, күн устата араас наадабытын быһаарсабыт, үлэҕэ туһанабыт, киэһэтин сэлэһэн ылабыт.
Бу көстүүнү олус киэҥ иэннээх сиргэ олорорбутунан, сибээс, суол хаачыстыбата мөлтөҕүнэн уонна, биллэн турар, “бассаап” туттуллара табыгастааҕынан быһаарыахха сөп. Аныгы үйэҕэ “бассаап” этэрбэс араадьыйатын солбуйда диэн этэр кыах толору баар.
Ангелина ВАСИЛЬЕВА, “Саха сирэ” хаһыат, www.edersaas.ru