Муударай дьон «сыарҕаны сайын, хотууру кыһын оҥостор ордук» диэн мээнэҕэ эппэттэр. Тыа хаһаайыстыбатын уонна ас-үөл бэлиитикэтин министиэристибэтэ сааскы ыһыы былаанын чопчулаата.
Былырыын өрөспүүбүлүкэ үрдүнэн бас билии көрүҥүттэн тутулуга суох, ыһыы 48 тыһ. 478 гектарга ыытыллан, былаан толоруллубута: бурдук 11 тыһ. 354 гектарга, сүөһү сиир култуурата 26 тыһ. 523 гектарга, ол иһигэр биир сыллаах от 12 тыһ. 120 гектарга ыһыллыбыта, хортуоппуй 8 тыһ. 395 гектарга, оҕуруот аһа 2 тыһ. 204 гектарга олордуллубута.
Ыһыы сирэ сыллата сыыйа кэҥэтиллэн иһэр. Ол курдук, 2016 с. ыһыы 46 тыһ. 574 гектарга ыытыллыбыт буоллаҕына, 2017 с. бааһына иэнэ 4 %-нан кэҥэтиллибитэ.
Быйыл 59 тыһ. 560 гектарга үлэлиир сорук турар. Бу иһигэр бурдук 11 тыһ. 505 гектарга ыһыллыахтаах, хортуоппуй 8 тыһ. 332 гектарга, оҕуруот аһа 2 тыһ. 214 гектарга олордуллуохтаах. Баалабайынан 13 тыһ. т бурдук, 79 тыһ. т хортуоппуй, 38 тыһ. т оҕуруот аһа хомуллуохтаах, 477 тыһ. т от, 19,5 тыһ. т сиилэс уонна 10,8 тыһ. т сенаж бэлэмнэниэхтээх. Бу сыалга судаарыстыбаттан көрүллэр өйөбүл барыллаан, 2017 с. таһымынан (296 млрд. 708 тыһ. солк) бигэргэннэ.
Раиса Сибирякова, Саха сирэ” хаһыат, edersaas.ru.