Сотору – “Этигэн Хомус-2017” ырыа куонкуруһун кыайыылаахтарын билиэхпит.
Биллэрин курдук, “Виктория”, “Виктория-Саха” радиостанциялар уонна “Виктория” рекламалыыр агентство “Этигэн Хомус” саха эстраднай ырыатын куонкуруһун, үтүө үгэс быһыытынан, сыл аайы тэрийэн ыыталлар. Быйылгы ХVII “Этигэн Хомус-2017” финала уонна кыайыылаахтарын наҕараадалааһына олунньу 24-25 күннэригэр Д.К.Сивцев-Суорун Омоллоон аатынан Опера уонна балет судаарыстыбаннай тыйаатырыгар ыытыллыаҕа. Бу, саха эстраднай ырыатын пропагандалыыр, эдэр композитордары, талааннаах ырыаһыттары өйүүр, көмөлөһөр, профессиональнай таһымнарын үрдэтэр, сахалыы ырыаны бастыҥ толорооччулары уонна бастыҥ ырыа ааптардарын быһаарар сүрүн сыаллаах-соруктаах куонкурус истээччи-көрөөччү болҕомтотун тардыыта сыллата күүһүрэн иһэр. «Этигэн хомус» сахалыы ырыа үрдүк профессиональнай таһымҥа тахсарыгар кыаҕы биэрэр. Куонкурус номинаннарыгар улахан сценаҕа суол аһыллар.
“Этигэн хомус” кыайыылаахтарыгар сыаналаах бириистэр – саха чулуу маастардара чочуйан оҥорбут чароит таас олохтоох ҮРҮҤ КӨМҮС ХОМУС туттарыллыаҕа.
Татьяна МАРКОВА, «Саха сирэ» хаhыат, edersaas.ru