Бүлүү улууhун Бороҕонугар Сергей Каратаев кэриэһигэр волейбол күрэхтэһиитэ буолла
Муус устар саҥатыгар Бүлүү улууhун Бороҕон нэhилиэгэр Сергей Каратаев кэриэһигэр аhаҕас волейбол күрэхтэһиитэ үрдүк таhымнаахтык буолан ааста. Тэрээhиҥҥэ Бүлүүттэн, Кэбээйиттэн, Мэҥэ Хаӊаластан 12 хамаанда кыттыыны ылла. Ону тэҥэ Cергей Каратаев өрөспүүбүлүкэтээҕи САХАВА-ҕа кыттыбыт, бииргэ оонньообут доҕотторо кыттыыны ыллылар. edersaas.ru
Сергей Каратаев бэс ыйын 22 күнүгэр 1968 сыллаахха Бороҕон нэhилиэгэр элбэх оҕолоох Михаил Семенович, Евдокия Трофимовна дьиэ кэргэнигэр күн сирин көрбүтэ. Тыа сирин үлэhит ыалыгар төрөөбүт буолан, бэрт кыра эрдэҕиттэн үлэҕэ-хамнаска эриллэн, оттоhон-мастаhан, илиитигэр-атаҕар сэниэлээх, бэйэтин лаппа кыанар буола улааппыта. Оскуолаҕа үөрэнэр сылларыгар спорт араас көрүҥэр уһулуччу кыахтааҕа биллибитэ. Ордук атах оонньуутугар, волейболга тахсыылаахтык оонньуура. Тренердэрэ Степан Каратаев, Николай Яковлев уолу утумнаахтык дьарыктаан, араас күрэхтэhиилэргэ кытыннарбытынан барбыттара. Сергей атах оонньуутугар ыстанан кыыралдьытара, волейболга өрө ыстанан баран, ханнык баҕарар илиитинэн дэгиттэрдик кыраhыабайдык быhара дьонугар-сэргэтигэр үтүө өйдөбүл быhыытынан өйгө-санааҕа умнуллубаттык хаалбыта. Кини кылгас да буоллар чаҕылхай олоҕор элбэх доҕордооҕо-атастааҕа, бултуурун-алтыырын, айылҕаҕа сылдьарын олус сөбүлүүрэ. Кэргэнэ Татьяна Викторовна уол оҕону бэлэхтээбитигэр, Сергей бэйэтин аатын биэрбитэ. Билигин кини уола Сергей эмиэ аҕатын утумнаан спордунан дьарыктанар: хапсаҕайга улуус, өрөспүүбүлүкэ хас да төгүллээх уонна ааспыт «Азия оҕолоро» оонньууларын чөмпүйүөнэ буолар. Эдэр кэскиллээх спортсмеҥҥа Бороҕон нэhилиэгин дьоно-сэргэтэ «Удьуору ууhатар уруйдаах олохтон!» диэн өйдөбүнньүк суруктаах чороон бэлэхтээтилэр, алгыс баhын сыалаатылар.
Бу күн эмиэ нэhилиэк баhылыга Андрей Иванов Сергей төрөппүт күн-күбэй ийэтигэр Евдокия Трофимовнаҕа, сэрии кэмин оҕотугар, холкуос, сопхуос биир үтүө суобастаах, туруу үлэhитигэр үбүлүөйдээх 80 сааhынан «Бороҕон бочуоттаах олохтооҕо» анал бэлиэни, «Өктөөп өрөбөлүүссэйэтин 100 сыла» мэтээли, Ил Түмэн Бочуоттаах Грамотатын үөрүүлээх быhыыга-майгыга туттарда. Итини сэргэ спорт бэтэрээннэригэр Василий Каратаевка, Дмитрий Унаровка, Иннокентий Семеновка аатырбыт спортсмен Сергей Каратаев аатынан анал мэтээллэри туттардылар.
Икки күннээх сыралаах, эт-тирии баранар күүстээх киирсиитин кэнниттэн муҥутуур чөмпүйүөннэринэн 50-55 саастаахтарга, 55 сааhыттан аҕа саастаахтарга ыалдьыттарбыт Мэҥэ Хаҥалас спордун бэтэрээннэрэ буоллулар. Олохтоох дьаhалта уонна Сергей бииргэ үөрэммит оҕолоро туруорбут сүрүн бириистэрин — убаhаны ыллылар. Онон, мэҥэ хоhууннара «Мэҥэлэр хайа үрдүгэр» диэн бэртээхэй этиини өссө төгүл бигэргэтэн биэрдилэр.
Кыайыылаахтар бары анал кубогынан, мэтээлинэн, сыаналаах бириистэринэн наҕараадаланнылар.
Сергей Каратаев ийэтин уонна бииргэ төрөөбүттэрин сыаналаах үс сүрүн бириистэрэ бэйэлэрин хаhаайыннарын эмиэ буллулар. Ол курдук, «Лучший игрок» ааты ылан, Бүлүү куорат хамаандатыттан Сергей өрөспүүбүлүкэҕэ бииргэ оонньообут таабырыhа Степан Кириллин булт саатын сертификатынан, «Лучший нападающий» Мэҥэ Хаҥаластан Алексей Дмитриев ааттанан 35.000 солк. сертификатынан, «Лучший защитник» Бороҕон хамаандатыттан Николай Иванов телевизорынан наҕараадаланан, кыайыы үрдүк өрөгөйүн биллилэр.
Дьахталлар хамаандаларыттан «Лучший игрок» номинацияҕа Тыымпыттан сылдьар биир дойдулаахпыт Надежда Сивцева элетромясорубканан, «Лучший нападающий» Августина Унарова Ил Түмэн депутатыгар кандидат Ньургуйаана Захарова туруорбут бирииhинэн — пылесоhунан, «Лучший защитник» бэлиэҕэ Кэбээйи Мукучутуттан сылдьар Аграфена Ксенофонтова биир санаанан талыллан, Бороҕон оскуолатын 1984 сыллааҕы выпускниктарын анал бириистэринэн наҕараадаланнылар. Итини таhынан, таhаарыылаахтык оонньообут чулуу спортсменнарга: Иван Решетниковка (Мэҥэ Хаӊалас), Александр Корякиҥҥа (Бүлүү), Петр Каратаевка (Бороҕон), Николай Шадриҥҥа (Бүлүү), Николай Гоголевка (Бүлүү), Петр Афанасьевка (Кэбээйи), Иван Гоголевка (Кэбээйи), Александра Сергинаҕа (Тыымпы), Сардаана Бороноваҕа (Тыымпы), Парасковья Федороваҕа (Бороҕон) о.д.а сыаналаах бириистэри туттардылар.
Биhиги оҕобут, бырааппыт, убайбыт, талааннаах ыччаппыт, тыа сирин спортсмена Сергей Каратаев аатынан волейбол күрэһэр кыттыбыт, ыытыспыт, спонсордаабыт, көмөлөспүт бар дьоммутугар, нэhилиэкпит баhылыгар А.И. Ивановка, чугас аймахтарбытыгар Филипп Кугаевскайга, Татьяна Михайловаҕа, тэрилтэлэргэ уонна бу тэрээhини икки күнү быhа кырдьыктаахтык дьүүллээбит дьоммутугар, саҥаран-иӊэрэн ыыппыт комментатордарбытыгар Н.Н. Гоголевка, С.С. Федоровка, итини сэргэ бэртээхэй кэнсиэри бэлэмнээн, дьон сынньалаҥын тэрийбит КСК дириэктэригэр А.Д. Каратаеваҕа, кини үлэhиттэригэр, буфет тэрийэн үлэлэппит аймах-билэ дьоммутугар ис сүрэхтэн дириҥ махталбытын тиэрдэбит. Эhиэхэ барыгытыгар тус олоххутугар дьолу-соргуну, үлэҕитигэр-хамнаскытыгар ситиhиини баҕарабыт.
Наталья ПРОКОПЬЕВА,
Бүлүү улууһун Бороҕон нэһилиэгэ.