Каникул кэмигэр Бүлүүтээҕи саастарын ситэ илик оҕолору реабилитациялыыр социальнай киин Аҕа сүбэтин кытта «Аҕа үөрэҕэ» диэн бырайыагы олоххо киллэрдилэр.
Бу бырайыак чэрчитинэн, аҥаардас төрөппүккэ иитиллэр 10-15 саастаах уон уолу түмэн, саха эр киһитин төрүт дьарыгар — бултуурга уонна балыктыырга үөрэттилэр.
Аан бастаан оҕолор Олоҥхо дьиэтигэр тиийэн, булка туттуллар сиэр-туом, төрүт үгэстэр, Байанайы аһатыы, о.д.а. туһунан лиэксийэни иһиттилэр, арчыланнылар. Ол кэнниттэн Кулуһуннаах күөлүгэр муус аннынан балыктыырга, иккис күн куобахха туһах иитэргэ, хаарга кыыл-сүөл суолун сонордуурга үөрэннилэр. Күөх Боллох балыгынан өлгөмнүк маанылаан, оҕолор олус астыннылар, үөрдүлэр. Онон эр киһи сиэринэн илии тутуурдаах, өттүк харалаах, киэһэ сииргэ кэһиилээх тиийэн, ийэлэрин үөртүлэр.
Бу бырайыагы Бүлүү куорат баһылыга Н.В. Афанасьев, Аҕа сүбэтин көхтөөх чилиэннэрэ Ю.И. Тутукаров, И.И. Акимов, Т.Т. Алексеев өйөөн, быһаччы көмөлөстүлэр.
“Аҕа үөрэҕэ” диэн бырайыак инникитин өссө атын оҕолору хабан, кэҥиир, салҕанар кэриҥнээх. Тоҕо диэтэр, аҕата суох хаалбыт оҕолорго, чуолаан уолаттарга бэйэлэрин итэҕэстээх курдук санаммакка, дьиҥнээх эр киһи, аҕа буола улааталларыгар көмөлөһөр сыаллаах.
Атын да улуустарга бу үтүө холобуру батыһаллара, аҥаардас төрөппүттээх оҕолорго көмөлөһөллөрө буоллар, үтүө санаа кыыма үксүө этэ. Кэнники кэмҥэ аҥаардас төрөппүт ахсаана элбээн иһэр, оттон оҕолор барахсаттар онно буруйа суохтар. Көмөҕө наадыйар кырачааҥҥа аһымал санаалаах буолуу, илиини уунуу – айыы киһитин сиэрэ.
Ангелина Васильева, “Саха сирэ” хаһыат, edersaas.ru