Дьокуускай куорат 66 кыбартаалыгар, Каландаришвили уулуссаҕа, Михаил Мярикянов «Хотугу тутуу хампаанньата» тутан испит дьиэтэ иккис мэндиэмэнигэр тиийэн баран турар. Билигин хампаанньаны моҥкуруут ыытан, эбийиэги атын тутааччыга биэриэхтээхтэр. Саҥа тутааччы тоҥоруллан турар тутууну ситэрэрин, өлүүлэһэн тутууга киирбит дьону дьиэлиирин иһин эбии сир учаастагын ылыаҕа.
edersaas.ru
Бу эбийиэк ортотунан галереянан холбонор икки куорпустан турар. Бастакы куорпус өрөспүүбүлүкэ бүддьүөтүттэн дьиэ-уот кэпэрэтиибигэр субсидия биэрэннэр, былырыын тутуллан бүппүтэ. Иккис уочараттаах дьиэҕэ өлүүлэһэн тутууга киирбит дьон кэпэрэтиип тэриммэтэх буоланнар, СӨ Тутуутун министиэристибэтэ атын суолу-ииһи көрдүүр.
«Якутпромстрой» тэрилтэҕэ Дежнев аатынан уулуссаҕа эбии сир учаастагын биэриэхтээхтэр. Оччотугар кини быраҕыллан турар тутууну түмүктүөхтээх. СӨ тутуутун миниистирэ Павел Аргунов этэринэн, тутааччыны уларытарга тустаах докумуоннары федеральнай министиэристибэҕэ уонна Арбитражнай суукка ыытыахтара.
Өлүүлэһэн тутууга киирбит дьон эбии харчы төлүөхтэрэ суоҕа, арай, дьиэлэрин иэнин уларыттахтарына, кэҥэттэхтэринэ эрэ эбиллиэн сөп. Страховой төлөбүр ылбыт дьон, бу бырагыраамаҕа киирбэттэр. 64 киһиттэн билигин 37-тэ хаалбыт. Кинилэртэн сорохторо 2019 сылга «Якутпромстрой» туппут атын дьиэтигэр киириэхтэрэ.
СӨ Тутуутун министиэристибэтэ Воинскай уулуссаҕа баар дьиэлэри эһиил бүддьүөт суотугар тутан бүтэрэр санаалаах.
«Чурапчыга түөрт кыбартыыралаах дьиэни, Дьокуускайга Автодорожнай 19-гар «Монолитстрой» 89 кыбартыыралаах дьиэ бастакы уочаратын тутан бүтэрэргэ сорук турар. Икки хос атыылааһынтан эмсэҕэлээбит 39 киһи социальнай төлөбүр ылыа. Өктөөп 50 сылын автострадатыгар баар дьиэни ахсынньы 28 күнүгэр туттарыахтара», — диэн эттэ миниистир Павел Аргунов.
Марианна ТЫРТЫКОВА, «Саха сирэ» хаһыат, edersaas.ru