Бэс ыйын үһүс өрөбүлэ — Медик күнэ.
СӨ Доруобуйа харыстабылын миниистирэ Михаил Охлопков нэһилиэнньэ олоҕун хаачыстыбата, демография, олох укулаата тупсарын туһугар үлэлиир биир идэлээхтэрин уонна өрөспүүбүлүкэ үрүҥ халааттаах аанньалларын идэлээх бырааһынньыктарынан эҕэрдэлээтэ.
«Убаастабыллаах биир идэлээхтэрим, медицинэ үлэһиттэрэ!
Гиппократ бигэргэтиитэ – «куһаҕаны оҥорума», Парацельс бигэргэтиитэ – “үтүөнү оҥор” диэн. Икки улуу үтүөрдээччи уонна икки улуу бөлүһүөк этиилэрэ быраас таҥараҕа тэҥнээх диэн санааҕа дьүөрэлэһэллэр. Ол гынан баран, бу бигэргэтии ис дьиҥин киһи эрэ барыта өйдөөбөт этэ.
Билигин, доруобуйа харыстабыла киһи аймах сайдыытын алтыс технологическай таһымыгар тахсар кэмигэр, биһиги эрэ бэйэбит медицинскэй информационнай үһүс куйаарбытын тэрийбиппитин өйдөөн эрэбит… Биһиги эрэ аныгы репродуктивнай технологиялар итиэннэ олох кыра ыйааһыннаах саҥа төрөөбүт оҕолору көрүү-истии курдук саҥа гуманитарнай технологиялары оҥоробут.
… Доруобуйа харыстабылын сүҥкэн ситиһиилэрин төрдүлэригэр чопчу дьон – биһиги медицинскэй үлэһиттэрбит: быраастар, медицинэ сиэстэрэлэрэ уонна санитардар тураллар. Эһиэхэ барҕа махтал!
Арассыыйаҕа олох уһуна ортотунан 70 саас буолара күүтүллэр буоллаҕына, ону 365 хонукка төгүллүүбүт. Киһиэхэ баара-суоҕа 25550 хонук бэриллэр. Бу мөлүйүөн буолбатах! Бэйэҕит уонна атын да дьон олоҕун хас биирдии түгэнин, хас биирдии чааһын уонна күнүн сыаналааҥ”.
Надежда ЕГОРОВА, “Саха сирэ” хаһыат, edersaas.ru