Бэҕэһээ Судаарыстыбаннай Дуумаҕа эмчиттэри үлэлэрин кэмигэр саба түһүүлэртэн, үөҕүүттэн көмүскүүр сыаллаах сокуон барыла көрүүгэ киирдэ.
Кырдьык, кэнники кэмҥэ быраастарга саба түһүү элбээтэ. Ыарыһах чугас дьоно бырааска саанар, үөхсэр да түгэннэрэ өрүү тахса турар.
Сокуон барылыгар медицинскэй үлэһиттэргэ куруубайдык сыһыаннаспыт (быдьар тылынан үөхсүү эҥин) киһини 1000-2500 солкуобайга диэри ыстарааптыыр туһунан этиллэр. Быраастары балыыһа иһигэр, үлэтин кэмигэр күлүгээннии саба түһүүлэртэн харыстыыр туһуттан оннук хобдох быһыыны оҥорбут киһини (ити ыарыһах чугас киһитэ буолуон сөп) 15 сууккаҕа хаайыахтарын сөп эбэтэр хармааныгар охсорун курдук ыстарааптыахтара. Ону сэргэ эмчиккэ саанар түбэлтэтигэр 5 сылга диэри хаайыыга да олордуохтарын сөп. Маны таһынан күһэлэҥ үлэнэн кыһарыйыахтара.
Онон бу сокуон барыла ылылыннаҕына, үрүҥ халааттаах аанньалларбыт быраап өттүнэн көмүскэллээх буолуохтара. Быһата, балыыһаҕа тылгын-өскүн туттунан, бэрээдэктээхтик сылдьыахтааххын.
Женни Стрюкова, “Саха сирэ” хаһыат.