Бу күннэргэ Ил Түмэн көрүүтүгэр СӨ бырабыыталыстыбатын бэрэссэдээтэлин бастакы солбуйааччы-экономика миниистирин кандидатуратын киллэриэхтэрэ.
Аҕыйах хонуктааҕыта бастакы вице-премьер-экономика миниистирэ Алексей Стручков дуоһунаһыттан босхолонон, «Якутскэнерго» ПАУо-ҕа генеральнай дириэктэри солбуйааччынан анаммыта.
Оттон кини оннугар Ил Дархан Егор Борисов бырабыыталыстыба бэрэссэдээтэлин бастакы солбуйааччы эбээһинэһин толорооччунан Михаил Осиповы анаата. Кини кандидатуратын бигэргэтэри-бигэргэппэти норуот дьокутааттара чугастааҕы пленарнай сессияларыгар көрүөхтэрэ.
Бу иннигэр, Михаил Анатольевич Федеральнай нолуок сулууспатын Саха сиринээҕи управлениетын салайааччытынан үлэлии олорбута. 2007-2012 сылларга өрөспүүбүлүкэ экономическай сайдыытын миниистиринэн, солбуйааччытынан үлэлээбиттээх. Онон, урукку миэстэтигэр кэллэ да диэххэ сөп. Бүгүн кини бастакытын бырабыыталыстыба мунньаҕар кытынна. Эһиилги бүддьүөтү көрдүлэр.
Анивера АКИМОВА, «Саха сирэ» хаһыат, edersaas.ru