Сайын ортото паромҥа киирэр туһугар, суоппардар уочараттарын кыайан быһаарсыбакка, бэйэ бэйэлэрин кытта айдаарсаллар, сороҕор охсуһаллар. Быйыл интэриниэт ситимигэр хас да видео тарҕанна. Ил Дархан э.т. Айсен Николаев СӨ бырабыыталыстыбатыгар Дьокуускай — Аллараа Бэстээх өрүһү туоруур биэрэккэ бэрээдэги олохтуур соругу туруорбутун быһаарыстылар диэн СӨ Ил Дарханын уонна бырабыыталыстыбатын пресс-сулууспата иһитиннэрэр.
Кыһалҕаны быһаарар соруктаах, Дьокуускайтан Аллараа Бэстээххэ туоруур паромҥа киириигэ быстах кэмҥэ улахан мал таһар массыыналары киирэллэрин аччатарга диэн быһаарыннылар. Ол курдук, бүгүн уонна өрөбүлгэ 14.00-23.59 ч. Дьокуускайтан Бэстээххэ айанныыр мал таһар улахан массыыналары паромҥа ылбаттар. Бу быһаарыныыны от ыйын 26 күнүгэр СӨ бырабыыталыстыбатын бэрэссэдээтэлин эбээһиннэһин толорооччу Владимир Солодов ыыппыт мунньаҕар ылыннылар. Бастатан туран, паромунан өрүһү туоруурга дьон олоҕор куттал суох буолуутун хааччыйыахтаахпыт диэн Владимир Солодов бэлиэтиир.
СӨ тырааныспарга уонна суол хаһаайыстыбатын министиэристибэтэ биллэрэринэн, күн аайы 1,6-2 тыһ. массыына өрүһү туоруур. Биир сырыыга паром 30-40 кыра уонна 8 улахан массыынаны туоратар.
Мунньах кыттыылаахтара, СӨ тырааныспарга уонна суол хаһаайыстыбатыгар миниистирин э.т Александр Тарасов, СӨ инновациятын, цифровой сайдыытын уонна инфокоммуникативнай технологиятын миниистирин э.т Анатолий Семенов, Мэҥэ Хаҥалас улууһун баһылыга Николай Старостин, «ЛОРП» ААУо генеральнай дириэктэрин э.т. Сергей Емельянов, тэрилтэлэр салайааччылара, паромнары салайааччылар Иван Анучин, Владимир Фролов, Владимир Козлов, Максим Дьячков уонна да атыттар күүстээх толкуй үлэтин ыыттылар.
Хас биирдии киһи паром кыһалҕатын быһаарарга бэйэтин санаатын эттэ. «ЯкСтар» IT хампаанньа үлэһитэ Айаал Протопопов интернет нөҥүө паром билиэттэрин атыылыыр буолуохха диэн этии киллэрдэ. Маны таһынан, паромҥа уочарат таһаарар сайты эбэтэр суотабай төлөпүөҥҥэ приложенияны оҥоруохха диэн этии киллэрдилэр. Бэрээдэги Бэстээх биэрэгэр ГИБДД үлэһиттэрэ ордук дьаһайаллар, Дьокуускайга паром биэрэгэр хас да суол киирэр буолан, бэрээдэги олохтуур уустук диэн парому дьаһайааччылар бэлиэтээтилэр. Владимир Солодов ГИБДД биэрэккэ үлэтин туһунан туспа ИДЬМ салалтатын кытта мунньахха кэпсэтиһиэхпит диэтэ.
Этиилэри истэн баран, Бырабыыталыстыба бэрэссэдээтэлэ Дьокуускай салалтатыгар паромҥа киирии бэрээдэгин хааччыйар туһалаах миэрэни ылынын диэн соруйда. Быйыл паромҥа киирэр сорох суоллары бетонунан бүөлээн эриэххэ, уонна улахан тырааныспардары туоратыы хааччахтааһына өрүһү туорааһын бэрээдэгин хааччыйыыга туһатын быһаарар туспа мунньах ыытыахпыт диэтэ.
Николай Попов, «Саха сирэ» хаһыат, edersaas.ru