Үөһээ Бүлүү улууһун борокуратуурата Быракаан орто оскуолатын спортивнай саалатын өрөмүөннээһиҥҥэ бүддьүөттэн көрүллүбүт үп-харчы хайдах туттуллубутун бэрэбиэркэлээтэ.
Вера МАКАРОВА, «Саха сирэ» хаһыат, https://edersaas.ru/
Бэрэбиэркэ быһаарбытынан, 2016 сыл от ыйыгар оскуола дириэктэрэ биир предприниматели кытта муниципальнай контракт түһэрсибиттэр. Оскуола спортивнай саалатыгар 1 мөл. 890 тыһ. солк. суумалаах капитальнай өрөмүөнү оҥорууга: 1 мөл. 800 тыһ. солк. — өрөспүүбүлүкэ бүддьүөтүттэн, 90 тыһ. солк. — олохтоох бүддьүөттэн.
Бүгүҥҥү күҥҥэ бэдэрээтчит үлэтин сороҕун эрэ толорбут, оттон эбийиэк акылаатын уонна хоруобуйатын уларытыахтаах сүрүн үлэлэр ыытыллыбатахтар.
Маныаха оскуола дириэктэрэ 2016 сыл атырдьах ыйыгар контрагынан көрүллүбүт үлэ барыта толорулла илигин билэр эрээри, соруйан, ымсыы санааттан, бэйэтигэр барыс киллэринээри, сулууспатын балаһыанньатын туһанан, үлэ толоруллубутун туоһулуур КС-2 пуормалаах аахтаҕа уонна толоруллубут үлэ туһунан КС-3 пуормалаах ыспыраапкаҕа илии баттаабыт.
Ити докумуоннарга олоҕуран, бэдэрээтчит счетугар 1 мөл. 890 тыһ. солк. харчы киирбит. Ол кэнниттэн бэдэрээтчит дириэктэргэ тутуу матырыйаалларын төлөбүрүгэр диэн, 150 тыһ. солк. биэрбит.
Борокуратуура бэрэбиэркэтин матырыйааллара силиэстийэ уорганнарыгар бэриллибиттэр.
Онно олоҕуран, РФ СК Саха сиринээҕи управлениетын Бүлүүтээҕи салаата холуобунай дьыала тэрийбит. РФ Холуобунай кодексатын 285-с ыст. 1 чааһынан, ол эбэтэр, дуоһунас боломуочуйатынан туһаныы бэлиэтэ баарынан.
Бу туһунан СӨ Борокуратууратын пресс-сулууспата иһитиннэрдэ.
Вера МАКАРОВА, «Саха сирэ», https://edersaas.ru/
Хаартыска: интернеттэн.