Тэрээһин муус устар 19 күнүгэр, сарсыарда 10:00 чааска, “Куруһаала” атыы-эргиэн киинигэр ыытыллар. “Олохтоох каадыры — бырамыысыланнаска” бырайыак СӨ бырабыыталыстыбатын сорудаҕынан тэриллибитэ.
Станислав ИОВЛЕВ, «Саха сирэ» хаһыат, edersaas.ru
Дьаарбаҥка ол бырайыакка олоҕуран, бырамыысыланнас улахан тэрилтэлэригэр үлэлиэн баҕалаах дьону түмэн, кинилэр үлэ булалларыгар көмөлөһүөхтэрэ. Дьаарбаҥканы Дьокуускай куорат нэһилиэнньэтин дьарыктаах буолуутун киинэ, “Импульс” ыччат үлэтин биржата уонна М.К.Аммосов аатынан ХИФУ тэрийэн ыытыахтара.
Дьаарбаҥкаҕа “Мечел”, “Колмар”, “Золото Селигдара”, “Алданзолото”, “Эльгауголь” хампаанньа бэрэстэбиитэллэрэ кыттыыны ылыахтара. Кинилэр үлэ көрдөнөөччүлэри кытары сирэй көрсөн, эбэтэр онлайн көмөтүнэн кэпсэтиэхтэрэ, сүбэ-ама биэриэхтэрэ. Бырамыысыланнас тэрилтэлэрэ быйыл араас оройуоннартан үлэтэ суох сылдьар, кырата 600 киһини үлэҕэ ылалларын туһунан судаарыстыбаннай кэмитиэти кытары дуогабардаспыттара. Дьаарбаҥка хас даҕаны хайысханан үлэлиэҕэ: саҥа саҕалаан эрэр предпринимателлэргэ сүбэ-ама, үөрэхтэрин саҥа бүтэрбит эдэр исписэлиистэргэ уонна араас идэҕэ үөрэниэн баҕалаахтарга анаан хас даҕаны үөрэтэр анал түмсүүлэр куурус ыытыахтара. Маны сэргэ, араас хайысхалар болҕомтону тардыахтара.
Үлэтэ суох сылдьар, бырамыысыланнаска үлэлиэн баҕалаах дьону сарсын “Куруһаала” атыы-эргиэн киинигэр күүтэллэр.
Станислав ИОВЛЕВ, «Саха сирэ» хаһыат, edersaas.ru