Өрөспүүбүлүкэ үрдүнэн 634 тыһ. 269 быыбардааччы баарыттан балаҕан ыйын 9 күнүгэр ыытыллыбыт быыбарга 50,71 %-а куоластаата. Ордук көхтөөхтөр: Өлөөн 90,34 %, Амма 80,04 %, Анаабыр 72 %. Нэстэрин көрдөрдүлэр: Ленскэй 35,03 %, Мирнэй 37,23 %., Алдан 40,24 %.
Быыбар тэрээһинигэр 423 мөл. солк. көрүллүбүт. Ол иһигэр, 2 мөл. солк. докумуоннары бэлэмнээһиҥҥэ, бүлүтүөннэри бэчээттэтиигэ, 10 мөл. солк. видеокамералары атыылаһыыга, быыбардыыр учаастактары саҥардыыга, 100 мөл. солк. докумуоннары тиэрдиигэ, болдьоҕун иннинэ быыбары тэрийиигэ, 220 мөл. солк. быыбар хамыыһыйаларыгар үлэлээбит сэттэ тыһыынча киһини хамнастыырга. 35 улуустааҕы уонна 20 куораттааҕы быыбардыыр хамыыһыйаҕа видеокамералар туруорулуннулар. Ил Дархан быыбарыгар 737 кэтээн көрөөччү, Ил Түмэн быыбарыгар 10 тыһ. 722 кэтээн көрөөччү үлэлээтилэр. Быыбары 232 аккредитациялаах суруналыыс сырдатта.
Быыбары сэргэ Эдьигээн эбэҥки национальнай нэһилиэгэр референдум ыытылынна. Онно куоластааччы 62,52 %-а арыгы атыытын бопто, 35,58 % -а арыгы атыытын көҥүллээтэ.
Раиса Сибирякова, «Саха сирэ» edersaas.ru.