Быыбар бүттэ. Түмүгү таһаарар кэм кэллэ. Нэһилиэнньэ көхтөөхтүк кытынна дииллэр эрээри, ханнык улуус бастакы миэстэҕэ тахсыбытын бу диэн ким даҕаны чопчу эппэт. Дьэ, ырытан көрүөҕүҥ эрэ.
edersaas.ru
Ил Дархан быыбардара
СӨ Киин быыбардыыр хамыыһыйата иһитиннэрэринэн, 2013 сыллааҕы Ил Түмэн быыбарыгар нэһилиэнньэ 45,49 %, 2014 сыллааҕы Ил Дархан быыбарыгар 52,75 %, иллэрээ күн буолан ааспыт быыбарга 50,71 % куоластаабыт. Ил Дархан икки кэнники быыбардарын тэҥнээн көрдөххө, дьон быыбарга кыттыыта, бу сырыыга 2,04 %-нан түспүт.
Үрүҥ уонна хара испииһэк
Аны улуустарынан ылан көрүөҕүҥ. Өрөспүүбүлүкэҕэ 34 улуус уонна Дьокуускай куорат баар буоллаҕына, бастакы бочуоттаах миэстэҕэ кимнээх тахсан, салалтаттан хайҕанар буоллулар? Өлөөн улууһун 90,34 %-на, Амма улууһун 80,04 %-на, Анаабыр улууһун 72 %-на быыбардаабыт. Ил Дархан ааспыт быыбарыгар анаабырдар 84,6 %, өлөөннөр 83,25 % тахсыбыттар. Кыттыы лаппа үчүгэй. Оттон бүтэһиктэн бастакылар испииһэктэригэр Ленскэй (35,03%), Мирнэй (37,23 %), Алдан (40,24 %) улуустара киирбиттэр.
Саастарынан көрүү
Аны сэмсэ курдук, дьокутаакка хандьыдааттар саастарын эридьиэстиэҕиҥ. Киин быыбардыыр хамыыһыйа чахчытынан, Ил Түмэҥҥэ дьокутаакка хандьыдаатынан турбут дьонтон үгүстэрэ 40-49 диэри саастаах эбит. Баһыйар үгүс ахсаана эр дьон (71,2 %) эбит.
28,8 % — Ил Түмэн дьокутаатыгар турбут дьахтар хандьыдаат
71,2 % — эр дьон
11,7 % — 30 диэри саастаах
21,7 % — 30-39 диэри саастаах
30,6 % — 40-49 диэри саастаах
19,8 % — 50-59 диэри саастаах
16,2 % — 60-тан үөһэ саастаах.
Түмүктээн эттэххэ, Саха сиригэр 634 269 быыбардааччы баарыттан 321 651 киһи куоластаата. Инньэ гынан, Саха сирэ Уһук Илин уокурукка быыбардааччытын ахсаанынан Чукотскай автономнай уокурук кэнниттэн иккис көрдөрүүлээх.
Людмила ПОПОВА, “Саха сирэ” хаһыат, edersaas.ru