Москваттан кэлэ сылдьар политолог Константин Калачев Дьокуускайга куоластаата. Итиэннэ дойду баһылыгын талар быыбарга Саха сирэ ураты көхтөөхтүк кыттарын бэлиэтээтэ.
—Быыбардыыр учаастактар бэртээхэйдик бэлэмнэммиттэр. Куолаһын биэрэ кэлбит киһиэхэ улахан болҕомто ууруллар. Барыта орун-оннугар, чуолкай, түргэн-тарҕан. Дьон-сэргэ инники дьылҕатын, олоҕун, кэскилин талар быһаарыылаах күнүгэр үрдүк эппиэтинэстээхтик сыһыаннаһара көстөр. Манна эбии “Якутия Выбирает” хаартысканан куонкуруһу тэрийэн ыытыы – бу норуот дойдутун дьылҕатыгар, кэскилигэр интэриэстээҕин көрдөрөр.
Бүгүҥҥү быһаарыылаах быыбарга биир эмэ киһи кыттыбатаҕына, арааһа, кэлин кыттыыны ылбатаҕыттан хомойо, кыбыста саныыра буолуо. Онон дойду инникитин санаан туран, куолаһы биэрэр ордук. Сабаҕалааһыммынан, быыбарга кыттыы бүгүн 70 бырыһыаҥҥа тиийиэ. Түмүк үчүгэй буолуо, — диэн санаатын үллэһиннэ.
Сардаана БАСНАЕВА, “Саха сирэ” хаһыат, edersaas.ru