Үчүгэй орто оскуолатыгар эбээн фольклорун үөрэтэллэр

Бөлөххө киир:

Кэлиҥҥэ кэмҥэ оскуолаларга фольклору үөрэтиигэ болҕомто күүскэ ууруллар. Биир оннук үтүө холобурунан Өймөкөөн улууһун Үчүгэй нэһилиэгин орто оскуолата буолар.

Александр ТАРАСОВ, «Саха сирэ» хаһыат, https://edersaas.ru
Былырыыҥҥыттан эбээн фольклорун, култууратын үчүгэйдик билэр-көрөр, аҕыс оҕо амарах ийэтэ Ирина Винокурова Үчүгэй нэһилиэгин орто оскуолатыгар эбии үөрэхтээһин учууталынан ананан, баҕалаах үөрэнээччилэргэ эбээн фольклорун, култууратын үөрэтэр.
Былырыыҥҥыттан оскуолаҕа эбээн фольклорун эбии үөрэхтээһин быһыытынан үөрэтэбин. «Умтичаан» диэн ансаамбыл тэрийдибит, биэс уол, түөрт кыыс дьарыктаналлар. Умтичаан диэн эбээннии — отон диэн. Оҕолор ансаамбылларыгар отон диэн тыл барсар дии санааммын, итинник ааттанныбыт, – диэн Ирина Христофоровна кэпсиир. – Ансаамбыл оҕолоро эбээннии ырыаны, үҥкүүнү, һээдьэни үөрэтэллэр. Кылаастарга эбээн фольклорун, сиэрин-туомун үөрэтэбин. Мин Красноярскай кыраай Аарка диэн бөһүөлэгиттэн төрүттээхпин. Бэйэм ыллыырбын олус сөбүлүүбүн, фольклорга тугу билэрбин, сатыырбын оҕолорго үөрэтэбин. Фольклорга аналлаах матырыйаалы хомуйар инниттэн командировкаларга, төһө кыалларынан, сылдьа сатыыбын.
– Ситиһии баар дуо?
Бэйэбит холбутугар сөптөөх ситиһии баар. Быйыл Өймөкөөн улууһун үрдүнэн «Дьүкээбил уоттара» диэн бэстибээл Үчүгэй нэһилиэгэр ыытыллыбыта. Ансаамбыл оҕолоро үс нүөмэринэн кыттан, лауреат аатын ылбыттара уонна «Хотугу норуоттар култуураларын үйэтитии» номинация кыайыылааҕынан ааттаммыппыт. Итини тэҥэ, бэйэбэр «Бастыҥ салайааччы» номинацияны туттарбыттара. – Оҕолор фольклору төһө интэриэһиргииллэрий?
Соһуйуох иһин, оҕолор барахсаттар олус интэриэһиргээтилэр. Биллэн турар, бастаан утаа оҕолору уһуйарга, үөрэтэргэ уустук соҕус этэ. Тоҕо диэтэххэ, оҕолор эбээн тылын-үөһүн билбэттэр буоллаҕа.
Оскуола дириэктэрэ Валентина Карпова уонна кэлэктиип үлэбин өйүүллэр. Төрөппүт кыыһым Семерина аны күһүн үөрэх дьылыттан эбии үөрэхтээһин быһыытынан баҕалаах оҕолорго эбээн тылын үөрэтиэҕэ.

– Ханнык ньыманы туһанан оҕолору интэриэһиргэттиҥ?
— Холобур, эбээннии хоһоону, ырыаны өйтөн ааҕалларыгар сорудахтыыбын. Ону үөрэтэр кэмнэригэр, хоһоон хас биирдии тылын суолтатын быһааран биэрэбин.
– Оҕолор һээдьэлиир кыахтаахтар?
Тута һээдьэни үөрэтэн барбытым. Олус тэтимнээх үҥкүү буолан, оҕолор сөбүлээтилэр, ылыннылар. Һээдьэ оһуохай курдук улуустарынан уратылаах, арахсар. Өймөкөөн улууһун һээдьэтин көрдүүбүн, булар киһи бэрт буолуо этэ.
– Нэһилиэккитигэр улахан дьон ансаамбылын тэрийиэххин баҕарбаккын дуо?
Улахан дьоҥҥо ансаамбыл тэрийэр баҕа баар. Кэм-кэрдии көрдөрөн иһиэҕэ. Билигин сүрүн сыалбынан оҕолорго эбээн култууратын үөрэтэ сатыахтаахпын.
– Быйылгы үөрэх дьылын бүтүүтүгэр отчуоттуур кэнсиэр туруорбуккут буолуо.

Ыам ыйын 24 күнүгэр отчуоттуур кэнсиэри туруордубут. Булчуттар олохторун-дьаһахтарын туһунан үҥкүүнү бэлэмнээбиппитин туруордубут. Кыргыттар булчуттарга таҥас тигэн иистэнэллэрин туһунан ис хоһоонноох үҥкүүнү дьон сэргээтилэр. Ансаамбыл оҕолоро эбээннии ырыалары толордулар, һээдьэлээтилэр.[vc_video link=»https://m.youtube.com/watch?v=MBlNjAbil0A&feature=youtu.be» title=»видео»]

+1
0
+1
0
+1
0
+1
0
+1
0
+1
0
+1
0