Быйыл “Чөмпүйүөннэр бааллара” быһа холоон ахсынньы 22 күнүгэр, сыл бүтэһик бээтинсэтигэр ыытыллыаҕа. Бу туһунан Спорт министиэристибэтигэр буолбут мунньахха быһаардылар.
Үгэс быһыытынан, Саҥа дьыл иннинэ аҕай буолар тэрээһиҥҥэ улахан дьон, үөрэнээччилэр итиннэ доруобуйаларынан хааччахтаахтар ортолоругар ааһан эрэр сыл уон чулуу спортсменын, кинилэр тириэньэрдэрин ааттыахтара, “Урожай” спорт уопсастыба уонна “Сахаада-спорт” ассоциация лауреаттарын чиэстиэхтэрэ.
Спорка үрдүкү маастарыстыба оскуолатыттан иһитиннэрбиттэринэн, быйыл тоҕус ый түмүгүнэн Саха сирин спортсменнара аан дойдутааҕы уонна Бүтүн Арасссыыйатааҕы күрэхтэһиилэргэ 117 араас мэтээли ылары ситистилэр. Ити былырыыҥҥы көрдөрүүтээҕэр арыый аҕыйах эрээри, сыл бүтүөр диэри билигин да үс ый баар.
Роман Попов, «Саха сирэ» хаһыат, edersaas.ru