Дьокуускайга ыытыллар боксаҕа Арассыыйа чөмпүйэнээтин бирииһин пуондата уон мөлүйүөн солкуобайга тэҥнэһиэҕэ. Бу туһунан өрөспүүбүлүкэ Ил Дарханын, бырабыыталыстыбатын пресс-сулууспата иһитиннэрдэ.
Дьокуускайга ыытыллар чөмпүйэнээккэ Олимпийскай оонньуулар икки төгүллээх чөмпүйүөннэрэ Олег Саитов уонна Алексей Тищенко, олимпийскай чөмпүйүөннэр Гайдарбек Гайдарбеков, Егор Мехонцев, Рахим Чакхиев, Александр Поветкин, Олимпийскай оонньуулар призердара, аан дойду чөмпүйүөнэ Александр Малетин, аан дойду икки төгүллээх чөмпүйүөнэ Евгений Макаренко, идэтийбит боксердар ортолоругар аан дойду чөмпүйүөнэ Георгий Канделаки бочуоттаах ыалдьыттарынан буолаллара күүтүллэр.
Билиҥҥитэ быйылгы күрэхтэһии кыайыылаахтара бары аан дойду 2019 сыллааҕы чөмпүйэнээтигэр хайаан да кыттыахтара диэн ким да мэктиэлиир кыаҕа суох. Онно, биллэрин курдук, Токиотааҕы Олимпийскай оонньууларга путевкалар оонньонуохтаахтара. Барыта сэтинньи ыйга буолуохтаах Любительскай бокса норуоттар икки ардыларынааҕы ассоциациятын мунньаҕар туох диэн быһаарыы ылыныллыаҕыттан тутулуктаах буолуоҕа. Онно Олимпиадаҕа ханнык ыйааһыннар киллэриллиэхтэрэ чопчуланыаҕа. Ол эрэ кэнниттэн дойду сүүмэрдэммит хамаандатын кылаабынай тириэньэрэ Эдуард Кравцов уонна кини көмөлөһөөччүлэрэ кимнээх аан дойду чөмпүйэнээтигэр кыттыахтарын быһаарыахтара.
Боксаҕа Арассыыйа чөмпүйэнээтэ алтынньы 13-21 күннэригэр Дьокуускайга, “Триумф” Спорт киинигэр ыытыллыаҕа.
Роман ПОПОВ, «Саха сирэ» хаһыат, edersaas.ru
Хаартыска: интэриниэттэн ылылынна