Манчаары оонньууларыгар анаан, Кэнтиктээҕи “Чап уустара” историко-этнографическай музей үлэһиттэрэ муннук тэрийэн туруорбуттарын спорт бырааһынньыгын күннэригэр ыраахтан-чугастан кэлбит ыалдьыттар кэрэхсии-сэҥээрэ көрдүлэр.
Тоҕо диэтэххэ, Манчаары Баһылай аатын үйэтитэр сыаллаах сахалыы илии-атах оонньууларыгар күрэхтэһии аан маҥнай 1968 сыллаахха ыытыллыбыт түгэннэрин кэпсиир хаартыскалартан кичэллээхтик таҥан оҥоһуллубут эргэ альбомнар манна эрэ бааллар. Аҕата тэрийбит, төрүттээбит музейыгар 2006 сылтан ыла дириэктэринэн үлэлиир Дмитрий Филиппов: “Бу мин аҕам, Боотулуу киһитэ Николай Никитич Филиппов түһэрбит хаартыскалара, — диэн ыйан көрдөрө-көрдөрө быһааран кэпсиир. – Кини Дьокуускайга университекка дипломнай үлэтин көмүскүү тиийбитигэр I спартакиадаҕа Үөһээ Бүлүү оройуонун бэрэстэбиитэлинэн анаабыттар. Аҕам эдэригэр тустуунан, гимнастиканан дьарыктаммыт буолан, спорду олус кэрэхсиирэ. Ол сылдьан түһэрбит хаартыскаларын мунньан, икки альбому оҥорбутун бу көрдөрүүгэ туруордубут”.
Николай Никитич альбомун таһыгар “I республиканская спартакиада трех поколений, 1968 год” диэн суруйбут. Ол быһаарыыта маннык: спортсменнары саастарынан үс бөлөххө арааран куоталаһыннарбыттар, уолаттары 18 саастарыгар диэри, бэтэрээннэри 35 саастан үөһэ диэн араарбыттар, ити икки ардыгар күннэрин оройугар сылдьар орто сүһүөх дьон илин былдьаспыттар. Күрэхтэһии ыһыах курдук добун хонууга ыытыллыбытын саһарбыт хаартыскалар саҥата суох кэпсииллэр. Ньурба бааһынайа Николай Санников кылыйан кыыралдьытара, Үөһээ Бүлүү хапсаҕайдьыттара утарылаһааччыларын умсарыта тардаллара көстөр.
Ити бастакы уонна эһиилигэр тута ыытыллыбыт Манчаары аатынан спартакиадалартан Үөһээ Бүлүү хамаандата иккитэ субуруччу бастаан, кыайыы көтөллөөх эргиллибитэ. Онуоха оройуон таһымыгар спорт национальнай көрүҥнэригэр Буучугурас кэриэһигэр спартакиада ыытыллар буолан, тэрээһиннээхтэрэ, бэлэмнээхтэрэ көмөлөспүтэ саарбаҕа суох. Сүүрбэһис үбүлүөйдээх күрэхтэһиини тэрийэн ыыта сылдьар улуус дьоно ол үйэ аҥаарын анараа өттүгэр аҕалара, эһэлэрэ ситиспит үрдэллэрин хатылыахтара дуо?
Василий НИКИФОРОВ, https://edersaas.ru/
Ааптар хаартыскаҕа түһэриитигэр: “Чап уустара” музей дириэктэрэ Дмитрий Филиппов аҕата Н.Н.Филиппов Манчаары аатынан бастакы спартакиада түгэннэрин түһэрбит хаартыскаларын көрдөрөр.
ЫСПЫРААПКА
Билиҥҥитэ 2-с бөлөххө үөһээ бүлүүлэр чурапчылардыын эгил-тэгил тардыалаһан иһэллэр. Ону бүгүҥҥү түһүлгэ түөрэҕэ быһаарыа.