Ыам ыйын 12 күнүгэр “Биир ньыгыл Арассыыйа” баартыйа көҕүлээһининэн “Ийэ дойдугар кыайыыны бэлэхтээ, доруобуйаҕар хардыыта оҥор” диэн 1941-1945 сылларга Аҕа дойду Улуу сэриитигэр Кыайыы 72-с сылыгар анаммыт акция ыытылынна. Бу тэрээһиҥҥэ өрөспүүбүлүкэ 25 улууһа уонна Дьокуускай куорат олохтоохторо көхтөөхтүк кытыннылар. edersaas.ru
Акцияҕа барыта 5 997 киһи кыттан, биирдии бэйэлэрэ кырата 10 тыһыынчаттан тахса хаамыыны оҥордо диэн тэрийээччилэр иһитиннэрэллэр.
Киин куоракка Култуура уонна сынньалаҥ пааркатыгар ыытыллыбыт тэрээһин кыттыылаахтарын арыгыны атыылааһыны хонтуруоллуур управление начаалынньыга, “Стимул” хаалыктаах хаамыыны сөбүлээччилэр кулууптарын салайааччы Матвей Лыткин уонна Саха Өрөспүүбүлүкэтигэр “ньыгыллар” “Здоровое будущее” бырайыактарын сүрүннээччи, куораттааҕы 3 №-дээх балыыһа кылаабынай бырааһа Светлана Давыдова эҕэрдэлээтилэр.
— Өрөспүүбүлүкэҕэ “Биир ньыгыл Арассыыйа” баартыйа 20-тэн тахса бырайыага ситиһиилээхтик үлэлиир, олортон түөрдэ спорка, чэбдик олоххо сыһыаннаах. Бүгүҥҥү тэрээһиммит кэнниттэн уонча да киһи хаамыынан дьарыктанар санааланнаҕына, ол биһиги барыбыт кыайыыбытынан буолуо этэ, — диэтэ Светлана Давыдова.
Тэрээһин бары кыттыылаахтарыгар георгиевскай лиэнтэлэр туттарылыннылар.
Роман Попов, “Саха сирэ” хаһыат, edersaas.ru