«Чэгиэн»: “Кристалл” клиника – болҕомтолоох сыһыан, хаачыстыбалаах өҥө

“Кристалл” клиника (“Доруобуйа дьиэтэ” медицина киинэ ХЭУо) 2013 сылтан аһыллан үлэлиир. Билиҥҥи кэмҥэ бу – Дьокуускай куорат киинигэр турар элбэх хайысхалаах аныгы киин.

edersaas.ru

Анал медицинскэй тиэхиньикэнэн хааччыллыытынан уонна үлэлиир исписэлиистэрин таһымнарынан судаарыстыбаннай поликлиникалартан хаалсыбат. Ону ааһан, уратыта диэн, манна уһун уочарат диэн суох, хас биирдии киһини үөрэ көрсөллөр, үтүөрүөххэ диэри тиһэҕэр тиэрдэн, болҕомтолоохтук сыһыаннаһаллар. Манна медицинскэй өҥөнү судургутук ылаҕын, ону тэҥэ сыаналара, атыттары кытта тэҥнээтэххэ, удамыр.

Үгүс киһи поликлиникаҕа, балыыһаҕа сылдьарын сөбүлээбэт. Ол иһин ыарыытын баалатан кэбиһиэн сөп. Оттон “Кристаллга” кини болдьоммут кэмигэр бэрт түргэнник үрдүк таһымнаах медицинскэй өҥөнү ылар.

Клиника ыарыыны диагностикалыыр, сэрэтэр уонна эмтиир элбэх бырагыраамаларынан үлэлиир. Аан бастаан сылдьыыга араас хайысхалаах быраастарга көрдөрөн, консультацияны ылыахха сөп.

Манна функциональнай диагностика, УЗИ, физиотерапевтическай отделениелар, клиническэй-диагностическай лаборатория, рефлексотерапия, массааһынан эмтээһин, күнүскү стационар, амбулаторнай хирургия бааллар. Бырааһы дьиэҕэ ыҥырыахха, ону тэҥэ үлэҕэ киирэргэ, быраап ыларга, о.д.а. бэрт түргэнник медосмотрдары ааһыахха сөп.

Биирдэ төлөөн баран, элбэх өҥөнү оҥорор кэлим бырагыраамалар үлэлииллэр. Бу бириэмэни да, харчыны да харыстыырга тоҕоостоох. Холобур, “Стандарт+” бырагыраамаҕа терапевка көрдөрөн баран, анаалыстары туттарыы, ЭКГ-га, УЗИ-га түһүү уонна өссө биир чинчийии (талан ылан) киирэр. Бу диспансеризацияны солбуйар өҥө. Хат дьахталлары төрүөхтэригэр диэри кэтээн көрүү, эм­тээһин бырагырааматын эмиэ олус биһирииллэр.

Кутталлаах ыарыылар бастакы көстүүлэрин эрдэ булан, кэмигэр эмтээтэххэ, түргэнник үтүөрэҕин, үгүс ыарыылаах процедуралары тумнаҕын. Биир холобуру ыллахха, баттаҕа түһэн, тараҕай буолан эрэр киһини поликлиникаҕа быраастан бырааска ыыталлар, тус-туспа анаалыстары туттарар, уһун уочараттарга олорор. Оттон манна биир бырагырааманы ылан, кылгас кэм иһигэр эмтэнэр. Ол курдук, сирэй хатаалланарын (угревая сыпь) эмиэ ситиһиилээхтик эмтииллэр.

Сытар балыыһа (стационар) бэйэтэ лабораториялаах, ол иһин анаалыс түмүгүн бэрт түргэнник быһаараллар. Ону тэҥэ УЗИ-га түһэрэр отделение, функциональнай диаг­ностика (СМАД, ХОЛТЕР, ЭКГ, маммография, о.д.а.) отделениета, физиотерапевтическай кабинет баар буолан, чинчийии тута оҥоһуллар. Стационарга сытан эрэ, хас да чаас уһуннаах процедуралары ыларга быраас, сиэстэрэ кэтээн көрөллөр. Манна терапия, эндокринология, акушерство, гинекология, неврология, гастроэнтерология, кардиология, пульмонология хайысхаларынан эмтэниэххэ сөп.

БОЛҔОЙУҤ! ОМС полиһынан күнүскү стационарга БОСХО медицинскэй өҥөнү ылыахха сөп. Ону тэҥэ “Кристалл” клиникаҕа сыһыарыллыбыт 3000-тан тахса пациеннардаах, кинилэр босхо эмтэнэллэр. Кэмиттэн кэмигэр ыытыллар акциялары уонна анал чэпчэтиилэри пациеннар олус сөбүлүүллэр, кэтэһэллэр.

Манна атын сиртэн кэлэн буолбакка, штатка киирбит исписэлиистэр үлэлииллэр. Клиника кинилэр квалификацияларын үрдэтэргэ үлэлиир, сотору-сотору дойду киин куораттарыгар ыытан үөрэттэрэр. Биир дьиэҕэ медицина киинэ, стоматология, аптека баар буолан, олус табыгастаах. Пациеннар аптекаҕа 10% чэпчэтиинэн туһаналлар.

Сүһүөх ыарыыларын эмтииргэ саҥа бырагыраама

“Кристалл” клиникаҕа сүһүөх, уҥуох ыарыыларын эм­тээһин – сүрүн хайысхалартан биирдэстэрэ. Манна анаалыстартан саҕалаан, араас манипуляцияларга (сүһүөх иһинээҕи укуоллар), чөлүгэр түһэриигэ (массаас, физиопроцедура) тиийэ, кэлимник эмтииллэр. Аччыгый хирургическай эпэрээссийэлиир саалаҕа, бэрэбээскилиир сиргэ “санпин” туох баар ирдэбиллэрэ тутуһуллаллар. Ревматолог Христина Эверстова уонна УЗИ бырааһа Надежда Филиппова күүстэрин түмэн, бииргэ үлэлииллэр. Пациент уруккутун курдук хамсана-имсэнэ сылдьарыгар, чөлүгэр түһэригэр туһуламмыт уонна ыарыы уустугурарыгар тиэрдибэт сыаллаах саҥа кэлим бырагырааманы оҥордулар.

Ыарыы төрүөтүн, сүһүөх төһө кэбирээбитин аппарат буолбакка, УЗИ исписэлииһэ быһаарар. Үчүгэй исписэлиис кыраҕы хараҕыттан кыра да кэһиллии саспат. Диагноһы таба туруоран, сөптөөх эмтэниигэ ыытар. УЗИ бырааһа Надежда Васильевнаны кытта сүһүөх ыарыыларын туһунан кэпсэттибит. Кини урут Ийэ уонна оҕо доруобуйатын харыстыыр кииҥҥэ өр кэмҥэ УЗИ бырааһынан үлэлээбитэ. 90-с сылларга мэйиини, өттүк уҥуоҕун УЗИ нөҥүө аан бастаан көрөн саҕалаабыттара. Билигин кини сүрүннээн уҥуох, сүһүөх ыарыыларынан дьарыктанар.

Клиникаҕа аччыгый эпэрээссийэлиир саала быйыл кулун тутарга аһыллыбыт. Челябинскайтан ревматолог, м.н.к. Инесса Деваль кэлэн, сүһүөх иһигэр манипуляцияларга үөрэтэн барбыта. Уопсайынан, “Кристалл” клиника салалтата быраастарын квалификацияларын үрдэтэргэ, дойду бастыҥ кииннэригэр үөрэттэрэ ыытарга кыһаллар. Ол курдук, Надежда Васильевна былырыын Челябинскайга профессор Кинзерскэй клиникатыгар уонна “АМТЕК-Казань” медкииҥҥэ баран саҥа технологиялары киллэриигэ үөрэнэн кэлбитэ. Билигин Кинзерскэй клиникатыгар сис тоноҕоһун ыарыыларын диагностикалыырга үөрэнэ сылдьар. Ааспыт күһүн Христина Николаевналыын Москваҕа Ревмоортопедтар ассоциацияларын I конгресстарыгар кыттыбыттара. Бу аан дойду учуонай-ревматологтарын түмпүт киэҥ далааһыннаах тэрээһин буолар.

Ыарыы тоҕо үөскүүрүй?

“Арамачыыс” диэн ааттыыр ыарыыбыт аата – артрит, остеоартроз диэн эбит. 50 саас кэннэ гормоннар уларыйаннар, уҥуохтан кальций суураллара элбиир, былчыҥ мөлтүүр, эчэйии да баар буолар. Сүһүөх өҥүргэһэ (хрящ) чарааһыыр, дардьама уларыйар, атах, өттүк уҥуоҕа хаадьайан, сүһүөххэ баттааһын улаатар, аалыллар. Суон киһи сүһүөҕэр ноҕорууската өссө улахан. Ону тэҥэ вирус, бактерия киирэн, эчэйии кэнниттэн (үксүн эдэрдэргэ), ыарыы эмиэ үөскүүр. Оҕо хамсаммат, ситэ аһаабат буоллаҕына, ыарыы үөскүүрүгэр төрүөт улаатар.

Хайдах эмтииллэрий?

Сааһырбыт дьон үгүстүк сүһүөх ыарыыларыттан эрэйдэнэллэр. Артроз 1,2 стадията үчүгэйдик эмтэниллэр, 3,4 стадияларыгар сүһүөх номнуо улаханнык эмсэҕэлээбит буолар. Оччоҕуна сүһүөх иһигэр бэриллэр укуоллар ыарыыны тохтотуохтарын сөп (4 стадияттан ураты). Төһөнөн эрдэ кэлэҕин – соччонон үчүгэй.

Кэлбит киһиттэн тута миэстэтигэр анаалыһы ылаллар, УЗИ-га түһэрэллэр. Наада буоллаҕына, МРТ-га, рентгеҥҥэ ыыталлар. Ол кэнниттэн, ыарыы баалаабыт буоллаҕына, эпэрээссийэлиир саалаҕа ыыталлар. Манна сүһүөх иһигэр плазмолифтинг, гиалуроновай кислота укуолларын туруораллар. Сүһүөх иһигэр уу мунньуллубут буоллаҕына, убаҕаһы оборторон ылан (пункция), лабораторияҕа ыытан, инфекция баарын, ханнык антибиотикка бэринэрин бэрэбиэркэлииллэр.

Плазмолифтинг – бу бэйэ хаанын ылан, центрифугаҕа эрийтэрэн, плазматын арааран баран, сүһүөх иһигэр киллэрэллэр. Испитэ тута тардан, өҥүргэһэ чөлүгэр түһэн барар. Эмтэнии кэнниттэн чөлүгэр түһэриигэ массаастааһын, физиотерапия, эмтиир физкултуура улахан суолталаахтар. “Кристаллга” олус үчүгэйдик массаастыыллар, физиопроцедуралары оҥороллор.

Билиҥҥи кэмҥэ бу эмтиир бырагырааманы ааһан, үтүөрбүт пациеннар махталлара улахан. Хас биирдии пациент ыарыытын хаамыытын кэтээн көрөр мониторинг, эмтэнии кэннэ босхо УЗИ уонна ревматолог консультацията ыытыллар.

Хайдах сэрэтиэххэ?

Ыарыыны эмтиэхтээҕэр, сэрэппит ордук. Эрдэттэн хамсана-имсэнэ, тымныыттан, эчэйииттэн харыстана, сөпкө аһыы (эти, хааны, быары, халадьыаһы, кальцийдаах бородуукталары сиэһин), кэмигэр эмтэнэ сылдьар киһи сүһүөх ыарыыларыгар ылларбат. Манна хаалыктаах хаамыы эмиэ туһалааҕын быраас тоһоҕолоон бэлиэтиир. Ол эрээри, быраабыланы тутуһан хаамыахха наада.

“Кристалл” клиника аадырыһа: Дьокуускай к., Дзержинскэй уул. 20.

Төлөпүөнэ: 732-255.

Сайт: www.crystal-clinic.ru

Instagram: @crystal_clinic_ykt.

Facebook: https://www.facebook.com/Дом-Здоровья.

Лицензия №: 14-01 002306-от 13.02.2018 г.

Имеются противопоказания. Требуется консультация специалиста.

 Ангелина ВАСИЛЬЕВА, «Саха сирэ» хаһыат, edersaas.ru