Россия ыраах сытар куораттарыттан, ол иһигэр Уһук Илин регионуттан көтүүгэ федеральнай бүддьүөттэн субсидия көрүллэр буолуоҕуттан, чэпчэтиинэн туһанааччы ахсаана элбээтэ.
РФ бырабыыталыстыбата таһаарбыт дьаһалыгар олоҕуран, субсидиялаах хайысхалар ахсааннара 67-тэн 73-кэ диэри элбээтэ. Саҥа маршруттар эбиллэн, Дьокуускайтан Красноярскайга, итиэннэ Нерюнгриттан Новосибирскайга, Симферопольга көтүүгэ чэпчэтиилээх билиэтинэн туһанар кыахтанныбыт.
«Якутия» АХ 2009 сылтан чэпчэтиилээх билиэттэринэн олохтоохтору хааччыйар. Ааспыт сылга 55867 киһи анал бырагыраама өҥөтүнэн туһаммыта. 2017 сылга чэпчэтиилээх билиэтинэн муус устар 1 күнүттэн саҕалаан алтынньы 31 күнүгэр диэри туһаныахха сөп. Сыаналарын ылан көрдөххө, төһө эмэ чэпчэки. Холобур, Дьокуускайтан Владивостокка диэри – 6400 солк., Дьокуускай – Москва – 7000 солк., Дьокуускай – Анапа – 8400 солк., Дьокуускай Симферополь – 8000 солк. тэҥнэһэр. Уопсайа, уонтан тахса субсидиялаах хайысха баар.
Чэпчэтиинэн 23 саастарын туола илик эдэр дьон, 60 саастарыттан үөһээ саастаах дьон, 55 саастарын туолбут дьахталлар, бастакы группалаах инбэлииттэр, инбэлиит-оҕону арыаллыыр дьон туһаналлар.
Хомойуох иһин, сорох авиа-хампаанньалар субсидиялаах билиэттэрин номнуо атыылаан бүтэрбиттэр. Vostokmedia.com суруйарынан, «Аэрофлот» АХ икки ый иһигэр билиэттэрин барытын атыылаан, бэс ыйын 1 күнүттэн чэпчэтиилээх билиэт атыытын тохтоппут.
[vc_text_separator title=»» i_icon_fontawesome=»fa fa-fighter-jet» color=»pink» add_icon=»true»]Субсидиялаах билиэттэри «ВИМ-авиа», «ЮТэйр», «Якутия», «АЛРОСА», «Сибирь», «Уральские авиалинии», «Икар», «Норд Стар» уонна «Северный ветер» авиа-хампаанньаларыттан атыылаһыахха сөп.
Анивера АКИМОВА, «Саха сирэ» хаһыат, edersaas.ru
Хаартыска: интэриниэттэн.