Өрөспүүбүлүкэбитигэр социальнай суолталаах хайысхаларга олохтоох бүддьүөттэн үп-харчы тыырыллар буолан, сыл ахсын тыһыынчанан киһи улаханнык ороскуокка тэбиллибэккэ, өрүс суолунан айанныыр кыахтанна. Бу күннэргэ СӨ Сыана бэлиитикэтин судаарыстыбаннай кэмитиэтэ социальнай суолталаах хайысхаларга саҥа тарыыптары олохтоото.
Анивера АКИМОВА, «Саха сирэ» хаһыат, edersaas.ru
«Дирекция единого заказчика» МУП Уус Куйгаттан Нижнеянскайга, Хаһааччыйаҕа уонна Усуйаанаҕа диэри пассажирдары чэпчэтиилээх тарыыбынан таһар. Уус Куйгаттан Нижнеянскайга диэри 323 килэмиэтир. Арыый да тэйиччи сытар. Быйылгы навигацияҕа билиэт сыаната улахан дьоҥҥо 3000 солк., оҕолорго 1500 солк. олохтоммут. Оттон Уус Куйгаттан 200 килэмиэтирдээх сиргэ баар Хаһааччыйа бөһүөлэгэр тарыып 1900 солк. (оҕолорго 950 солк.) бигэргэтиллибит. Уус Куйгаттан Усуйаанаҕа диэри – 2100 солк., оҕолорго — 1050 солк.
«Пассажирское райуправление» ХЭУо Өлүөхүмэ, Хаҥалас, Кэбээйи, Уус Алдан улуустарыгар социальнай суолталаах хайысхаларынан дьоҕус суудуналарынан рейстэри оҥорор. Холобур, Дьокуускайтан Сангаарга диэри тарыып улахан дьоҥҥо 3200 солк., оҕолорго 1600 солк., Дьокуускайтан Уус Алдан Дыгдалыгар диэри 1980 солк. (оҕолорго 990), Дьокуускайтан Хаҥалас Иһитигэр диэри 2200 солк. (оҕолорго 1100), Дьокуускайтан Эдьигээҥҥэ – 7300 солк. (оҕолорго 3650), Дьокуускайтан Өлүөхүмэҕэ – 5900 солк. (оҕолорго 2950) быһыллыбыт.
«Высоцкий Н.А.» ИП Уус Маайаттан Хаандыгаҕа диэри пассажирдары таһар. Уус Маайаттан Хаандыгаҕа диэри билиэт сыаната улахан дьоҥҥо 3700 солк. (оҕолорго 1850 солк.).
Пассажирдар тарыып дьиҥнээх экономическай сыанатыттан 75%-нын төлүөхтэрэ, оттон 25% өрөспүүбүлүкэ бүддьүөтэ уйунуо.
Анивера АКИМОВА, «Саха сирэ» хаһыат, edersaas.ru
Хаартыска: интэриниэттэн