Бэҕэһээ, балаҕан ыйын 24 күнүгэр, Уус Алдан улууһун Чэриктэй сэлиэнньэтигэр социальнай суолталаах эбийиэк уокка былдьанна.
Бу дьиэҕэ дьаһалта, спортсаалата, кулууп, почта бааллар эбит. Туох баар докумуоннар, офис маллара барыта уокка былдьаммыттар.
Барыллаан быһаарыынан, сыбааркалыыр үлэ ыытыллыбытын кэнниттэн турбут курдук. Дьолго, ким да эмсэҕэлээбэтэх.
Бу күн Бороҕоҥҥо улуус баһылыгын инаугурацията буолбут, дьаһалта үлэһиттэрэ онно сылдьыбыттар.
РФ Ыксаллаах быһыыга-майгыга министиэристибэтин Саха сиринээҕи управлениета:
— Балаҕан ыйын 24 күнүгэр, күнүс 12.17 мүн. баһаарынай-быыһыыр сулууспаҕа иһитиннэрии киирбит. Уус Алдан улууһун Чэриктэй сэлиэнньэтигэр Гуляев уулуссатыгар турар икки этээстээх арочнай дьиэҕэ уот турбутун туһунан.
Бастакынан, 5 мүнүүтэнэн, быһылаан сиригэр добровольнай баһаарынай хамаанда тиийбит. Ол тиийбиттэрэ — уот номнуо дьиэни барытын ылбыт. Уот туохтан, ким буруйунан турбутун, төһө хоромньу тахсыбытын бэрэбиэркэ быһаарыаҕа.
Уоту умулларыыга 20 баһаарынай уонна 4 техника кытынна.
Хаартыска: батсааптан.