Уһук Илиҥҥи уокурук ис дьыалаҕа уорганнарын олоҕор чахчы да долгутуулаах, дьоһуннаах, умнуллубат бэлиэ событие бэҕэһээ, бэс ыйын 15 күнүгэр, Дьокуускай куоракка Опера уонна балет тыйаатырыгар буолла. Биһиги өрөспүүбүлүкэбитигэр «ЧИЭС уонна КИЛБИЭН» диэн Бүтүн Арассыыйатааҕы уопсастыбаннай акция үһүс төгүлүн ыытылынна.
Бу иннинэ 2009 уонна 2013 сылларга ыытыллыбыта, быйылгы акция Арассыыйа полициятын 300 сылыгар уонна саха милииссийэтин 100 сылыгар ананна. Бу бириэмийэ дойду ис дьыалаҕа уорганнарын итиэннэ ис сэриилэр бэтэрээннэрин сэбиэтин көҕүлээһининэн 2004 сыл атырдьах ыйыгар тэриллибитэ.
Акция сүрүн сыалынан ис дьыала уорганнарын уонна ис сэриилэр үлэһиттэригэр, бэтэрээннэригэр дьон-сэргэ болҕомтотун тардыы, бэрээдэги араҥаччылааһыҥҥа, бөҕөргөтүүгэ, буруйу оҥорууну утары охсуһууга бастыҥ үлэлээх, ситиһиилээх сотрудниктары чиэстээһин буолар.
Маны тэҥэ, бастыҥ кадрдары бэлэмнээһиҥҥэ үтүөлээх итиэннэ хорсун быһыыны, эр санаалаах буолууну, көмөҕө кэлэргэ куруук бэлэм буолууну көрдөрбүттэр, сотрудниктар чугас дьонноро, бэтэрээннэр эмиэ буолаллар.
Элбэх ыалдьыт кэлбит: акцияны төрүттээччи, сүрүннээччи — РФ ИДьМ-тын миниистирин көмөлөһөөччүтэ, бэтэрээннэрин сэбиэтин бэрэссэдээтэлэ, астаапкаҕа сылдьар ис сулууспа генерал-полковнига Иван Шилов итиэннэ Хабаровскайтан, Приморьеттан, Камчаткаттан, Сахалинтан, Амурскай уобаластан үрдүк сололоох салайааччылар, акция кыайыылаахтара кэлбиттэр.
Барыта 11 номинациянан бириэмийэлэр туттарылыннылар, ол: «За героизм и мужество», «За верность служебному долгу», «За бескомпромиссную борьбу с преступностью», «За охрану общественного спокойствия», «За гуманизм и великодушие», «За достижения в спорте», «За продолжение славных традиций», «За преданность профессиональному и общественному долгу, верность ветеранскому движению», «За интеллектуальный вклад в защиту законности и правопорядка».
Маныаха саамай долгутуулаах түгэнинэн бириэмийэни «Они сражались за Родину» уонна «За материнский подвиг» номинациялар кыайыылаахтарыгар туттарыы буолла. Кинилэри сүһүөхтэригэр туран, ытыс тыаһынан эҕэрдэлээтилэр.
Бу «Они сражались за Родину» бириэмийэнэн астаапкаҕа сылдьар милииссийэ полковнига, Аҕа Дойду Улуу сэриитин бэтэрээнэ Николай Петрович Олесов буолла.
Оттон «Материнский подвиг» номинация Галина Никитична Авдееваҕа туттарылынна – Дагестаҥҥа сулууспатын эбээһинэһин толоро сылдьан өлбүт Федор Авдеев ийэтигэр.
Саха Өрөспүүбүлүкэтиттэн бэлиэтэммит дьонунан буоллулар: «За героизм и мужество» номинацияҕа — полиция капитана, оҕону баһаартан быыһаабыт Иван Бурнашев, «За преданность профессиональному и общественному долгу, верность ветеранскому движению» — астаапкаҕа сылдьар милииссийэ подполковнига Егор Михайлов, «За продолжение славных традиций» — астаапкаҕа сылдьар милииссийэ полковнига Виктор Сосин, «За достижения в спорте» — астаапкаҕа сылдьар милииссийэ полковнига Павел Пинигин уонна полиция майора Алексей Варламов.
Кыайыылаахтары Саха сирин ааттаах-суоллаах артыыстара, үҥкүү ансамбллара итиэннэ ис дьыала уорганнарыгар сулууспалыыр талааннаах сотрудниктар эҕэрдэлээтилэр.
Түмүккэ, Иван Шилов маннык үрдүк тэрээһиннээхтик ыытыллыбыт акция иһин өрөспүүбүлүкэ, Ис дьыала министиэристибэтин, быраабы араҥаччылыыр уорганнар салалталарыгар, бүтүн саха полициятыгар истиҥ махталын биллэрдэ.
Вера МАКАРОВА, «Саха сирэ» хаһыат, edersaas.ru
Хаартыскалар: СӨ ИДьМ-тын пресс-сулууспата
