«Чолбон» уус-уран-литературнай уонна уопсастыбаннай-политическай сурунаал ааҕааччыларын, айар үлэҕэ ылсан эрэр дьону кытары атах тэпсэн олорон кэпсэтэр үгэһэ салҕанар. edersaas.ru
Ахсынньы 6 күнүгэр Хотугулуу-Илиҥҥи норуоттар тылларын уонна култуураларын институтун «литэрэтиирэ үлэһитэ» уонна «литэрэтииринэй айар үлэһит» салааларын устудьуоннара «Чолбон» сурунаал эрэдээксийэтигэр ыалдьыттаатылар.
Кинилэр бу сырыылара устудьуоннар институкка ылбыт билиилэрин быраактыканы, дьиҥнээх үлэни-хамнаһы кытары ситимниир соруктаах буолла. Сурунаал уопуттаах үлэһиттэрэ эдэрдэрдиин саха литэрэтиирэтигэр кириитикэ төһө сайдарын, инникитин ханнык хайысханы тутуһуохтааҕын, эдэр кириитиктэри иитэн таһаарарга туох үлэ барыахтааҕын сүбэлэстилэр. Эрэдээктэр Данил Макеев сурунаал 95 сыллаах историятын кэрдиис кэмнэрин билиһиннэрдэ. Кириитикэ, библиография салаатын сэбиэдиссйэ Иван Осипов—Уйбаан Ойуур кириитик ырытыытыгар ирдэниллэр сүрүн түгэннэри, ол иһигэр, аныгы кэм сорох ааптардарын тыллара-өстөрө сыппаабытын, күннээҕи олоххо-дьаһахха туттуллар тылларынан муҥурданалларын, тоһоҕолоон бэлиэтээтэ.
Литэрэтиирэ эйгэтигэр үлэлиэн баҕалаах эдэр дьон сөбүлээн ааҕар ааптардарын айымньыларыттан кылгас ырытыылары сэҥээрэн иһиттилэр. Түмүккэ: «Икки өттүттэн олус көдьүүстээх кэпсэтиигэ ыҥырбыккытыгар, кириитикэҕэ интэриэһи үөскэппиккитигэр махтанабыт», – диэн икки өттүттэн көдьүүстээх көрсүһүү буолбутуттан астынан тарҕастылар.
Надежда ЕГОРОВА, «Саха сирэ» хаһыат, edersaas.ru