Үөһээ Бүлүү улууһун дьаһалтата Кытай Өрөспүүбүлүкэтин Хэйлунцзян провинциятын Тунцзян куоратын бырабыыталыстыбатын кытта социальнай-экономическай уонна култуура эйгэтигэр бииргэ үлэлээһиҥҥэ сөбүлэһии түһэрсибитэ алтыс сылыгар барда. Ити бэлиэ түгэҥҥэ анаммыт спорт скверэ улуус киинигэр, Бүлүү эбэ үрдүк хампа күөх кырдалыгар тутуллан, бу сайын силигэ ситэн, үбүлүөйдээх Манчаары оонньууларын кэмигэр үөрүүлээх быһыыга-майгыга аһыллыбыта. Тэрээһиҥҥэ үөһээ бүлүүлэр күндү ыалдьыттара – бырааттыы Тунцзян куорат бырабыыталыстыбатын дэлэгээссийэтэ кыттыыны ылбыта.
Манна, сымара тааска майгынныыр оҥоһук аттыгар Тунцзян куорат олохтоохторун бэлэхтэрэ – түөрт спортивнай былаһааккаттан биирдэстэрэ — туруоруллан, дьон-сэргэ сөбүлээн сылдьар, сэрээккэлиир, Бүлүү эбэттэн сайа охсор чэбдик салгынынан тыынар, дуоһуйа сынньанар сиригэр кубулуйда.
Бу үс миэтэрэ үрдүктээх, уонча миэтэрэ усталаах, икки миэтэрэттэн тахса туоралаах дьикти оҥоһугу Кытайтан анаан-минээн кэлбит скульптор Ван Фей Хонг кыһаллан-мүһэллэн оҥордо. Кини эппитинэн, Кытайга таас эрэллээх буолуу, дьол, үтүө турук символынан буолар эбит.
Оҥоһук биир ойоҕоһугар өндөл халлааҥҥа кыыһа оонньуур саһарҕа уота, доллоһуйа устар өрүс, дьол былыта, киэһээҥҥи айылҕа ойууламмыттар. Соҕурууҥҥу өттүгэр Ыалдьытымсах быһыы бэһэ киһи хараҕар быраҕыллардыы чочуонайдык оҥоһуллубут. Биллэрин курдук, аан дойдуга соҕотох “Ыалдьытымсах быһыы бэһэ” Кытайга, Аньхуай провинцияҕа үүнэн турар, ЮНЕСКО киһи-аймах аан дойдутааҕы нэһилиэстибэтин испииһэгэр киллэриллибитэ. Адаарыспыт лабаалардаах мас бэйэтин быһыытынан ааһан иһэр дьону эҕэрдэлээн илиитин ууммут киһини санатар.
Бэс аннынан алта иероглиф ойо быһыллан ойууламмыт, “Биһиги доҕордоһуубут үйэлэри уҥуордаатын” диэн ис хоһоонноох. Оҥоһук сирэйигэр кытайдыы, нууччалыы «Спортивный сквер г. Тунцзян Китая» диэн сурук ырылыйан көстөр.
Олохтоохтор этэллэринэн, маннык оҥоһугу кытайдар истиҥ доҕордуу сыһыаннарын бэлиэтигэр дьэндэтэллэр үһү. Сураҕа, Саха сиригэр билиҥҥитэ бу соҕотох тутуу.
Роман Попов, “Саха сирэ” хаһыат
Ааптар хаартыскаҕа түһэриитэ.