Нерюнгри оройуонугар Чульмаҥҥа «Колмар» хампаанньа үлэһиттэригэр анаан 5 олорор куорпус тутуоҕа. Бүгүн премьер-миниистир Евгений Чекин дьиэлэр тутуллуохтаах сирдэрин көрдө, тутуу саҕаламмытын биллэрдэ. edersaas.ru.
«Бу аҥаардас хампаанньаҕа эрэ буолбакка, Чульман олохтоохторугар бэлиэ күн. Бөһүөлэк инфраструктурата сайыннаҕына, тутуу барар буоллаҕына, дьон санаата кэлэр, инникигэ эрэлэ күүһүрэр», — диэн бэлиэтээн туран, бөһүөлэк олохтоохторун эҕэрдэлээтэ.
Бу комплекска остолобуой, оҕо оонньуур, спортивнай былаһааккалара баар буолуохтара. Хампаанньа генеральнай дириэктэрин солбуйааччы Артем Левин бэлиэтииринэн, үлэһиттэр олорор дьиэлэрин чуолаан Чульмаҥҥа тутан саҕалаабыттара мээнэҕэ буолбатах. «Чульман икки бырайыакпыт, хайа байытар комплекстарбыт, икки ардыгар турарынан табыгастаах. Манна 1100 киһи олоруоҕа», — диэн бэлиэтиир кини.
Хампаанньаҕа уопсайа 4000-тан тахса киһи үлэлиэхтээх. Кэнэҕэскитин хампаанньа оройуон, бөһүөлэк салалтатын,кытары сүбэоэһэн өссө олорор дьиэлэри, социальнай эбийиэктэри тутар санаалаах.
Чульман баһылыга Сталик Диряхин «Колмар» бөһүөлэккэ саҥа тыыны киллэрбитин этэн туран, махталын биллэрдэ.
Аграфена КУЗЬМИНА, «Саха сирэ» хаһыат, edersaas.ru.